ԵՐԵՎԱՆ, 1 հուլիսի — Sputnik. ՀՀ գյուղատնտեսության նախարարության Սննդամթերքի անվտանգության պետական ծառայությունն արգելել է Հայաստանի տարածք ներմուծել սննդամթերքի անվտանգության ցուցանիշներին չհամապատասխանող 19.5 տոննա բրոյլեր տեսակի հավի սառեցված միս, հայտնում է գերատեսչության մամուլի ծառայությունը:
Հաղորդագրության մեջ նշվում է, որ սահմանային վերահսկողության շրջանակներում՝ ՀՀ ԳՆ Սննդամթերքի անվտանգության պետական ծառայությունը «Դոնմալ» ՍՊԸ-ի կողմից Ուկրաինայի Հանրապետությունից ներմուծվող հավի սառեցված միսն ուղարկել է լաբորատոր փորձաքննության:
«Արդյունքում պարզվել է, որ բեռը ՄԱՖԱՄ, ախտածին, ա/թ սալմոնելաներ և լիստերիա ցուցանիշներով չի համապատասխանում Մաքսային միության (ԵԱՏՄ) «Սննդամթերքի անվտանգության մասին» տեխնիկական կանոնակարգի պահանջներին, հետևաբար` այն որպես սննդամթերք օգտագործելու համար պիտանի չէ», — նշված է հաղորդագրության մեջ:
Նկատի ունենալով վերոնշյալը` ՀՀ ԳՆ Սննդամթերքի անվտանգության պետական ծառայության կողմից արգելվել է բեռի ներմուծումը հանրապետություն, իսկ տնտեսավարողին հանձնարարվել է այն վերաարտահանել:
