ԵՐԵՎԱՆ, 1 հուլիսի — Sputnik. Հունիսի 30-ին դատարանը որոշում կայացրեց «Անալիտիկ» կայքի խմբագիր Անի Հովհաննիսյանի կալանքը ևս երկու ամսով երկարաձգելու մասին։ Հովհաննիսյանի պաշտպան Լիպարիտ Սիմոնյանը Sputnik Արմենիայի հետ զրույցում նշեց, որ դատարանի որոշման մեջ հիմնավոր պատճառաբանություն չկա։
«Նախ` չկա հիմնավոր կասկած առ այն, որ Անի Հովհաննիսյանը կատարել է իրեն մեղադրված արարքը։ Երկրորդ` դատարանի որոշումը որևէ կերպ պատճառաբանված չէ, առկա չէ որևէ հիմք, որ նա ազատության մեջ մնալու դեպքում կարող է խոչընդոտել, թաքնվել քննությունից։ Դատարանի որոշումը բոլոր դեպքերում ժամկետանց է Քրեական դատավարության օրենսգրքի 139 հոդվածի իմաստով»,- ասաց պաշտպանը։
Նա պարզաբանեց, որ եթե դատարանը գտնում էր, որ կալանքի ժամկետը պետք է երկարացնել, ապա այն պետք է կատարեր ժամկետը լրանալուց առնվազն 5 օր առաջ, ինչպես 139-րդ հոդվածի պահանջն է, այնինչ որոշումը եղել է 4 օր առաջ։ Անի Հովհաննիսյանի կալանքի ժամկետը լրանում է հուլիսի 3-ին։
«Դատարանը մեխանիկական որոշումներ է կայացրել` ստանդարտ ձևակերպումներով։ Մեր դատական ատյանների կողմից նման որոշումները բազմաթիվ են։ Պարզապես կարելի է այնտեղ անուն-ազգանունները փոխել»,-ասաց Լիպարիտ Սիմոնյանը։
Նա մեջբերեց դատարանի հիմնավորումը, որ առկա է կասկած, և ենթադրվում է, որ Անի Հովհաննիսյանը կխուսափի ու կխոչընդոտի քննությանը։
Նշենք, որ analitik.am կայքի խմբագիր Անի Հովհաննիսյանը ձերբակալվել է ՀՀ քրեական օրենսգրքի 182-րդ հոդվածի 2-րդ մասի 2-րդ կետով հարուցված քրեական գործով՝ ԱԺ պատգամավորից գումար շորթելու կասկածանքով:
