ԵՐԵՎԱՆ, 1 հուլիսի — Sputnik. Ռուսաստանի քաղպաշտպանության, արտակարգ իրավիճակների և տարերային աղետների հետևանքների վերացման նախարարության հատուկ ինքնաթիռն ուրբաթ Հայաստանի ևս 50 քաղաքացու կտեղափոխի Երևան ու Ռուսաստան կտանի 13 մարդու` կապված սելավի պատճառով ռազմավիրական ճանապարհի փակվելու հետ, ՌԻԱ Նովոստիին հայտնեց ՌԴ ԱԻՆ Հյուսիսային Օսեթիայի գլխավոր վարչության ներկայացուցիչը։
Ընդհանուր առմամբ ՌԴ ԱԻՆ չորս չվերթերով արդեն տեղափոխվել է Հայաստանի 196 քաղաքացի։
«Հայաստանի քաղաքացիների տարհանումը կշարունակվի, առավոտյան նախատեսված է հերթական թռիչքը, Երևան կտեղափոխվի 50 մարդ։ Ծրագրվում է, որ հատուկ ինքնաթիռով Ռուսաստան կտեղափոխվի 13 մարդու, ովքեր ցանկացել են լքել Վրաստանը»,- ասաց գործակալության զրուցակիցը։
Ավելի վաղ ՀՀ վարչապետ Հովիկ Աբրահամյանը դիմել էր իր ռուս գործընկեր Դմիտրի Մեդվեդևին` խնդրելով աջակցել Հայաստանի 200 քաղաքացիներին Վլադիկավկազից Հայաստան տեղափոխելու հարցում։
Հիշեցնենք, որ հունիսի 23-ին, ժամը 16.40-ի սահմաններում Վրաստանի ՆԳՆ ԱԻ դեպարտամենտից տեղեկություն էր ստացվել, որ Վերին Լարսի անցակետից մոտ 2 կմ հեռավորության վրա (Վրաստանի տարածքում), Թերեք գետի վարարման հետևանքով ավտոճանապարհի 500-600 մ հատված է փլուզվել, և այդ պատճառով փակվել է ՌԴ-Վրաստան սահմանային անցակետը: Անվտանգության նկատառումներից ելնելով՝ նշված ավտոճանապարհով արգելվել է բոլոր տեսակի տրանսպորտային միջոցների երթևեկությունը:
