ԵՐԵՎԱՆ, 1 հուլիսի — Sputnik. ԱՄՆ պետքարտուղար Ջոն Քերին հինգշաբթի Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հետ հեռախոսազրույցների ժամանակ նրանց կոչ է արել «խուսափել իրավիճակի սրումից» Ղարաբաղում, հայտնում են պետդեպարտամենտից։
«Նա (Քերին) դրական է գնահատել այն փաստը, որ Լեռնային Ղարաբաղի շփման գծում վերջին շաբաթների ընթացքում հիմնականում պահպանվում է հրադադարը, և նախագահներին կոչ արեց խուսափել սրումից` խաղաղ գործընթացն առաջ տանելու համար»,- ասված է գերատեսչության հաղորդագրության մեջ։
Պետքարտուղարը հաստատեց նաև ԱՄՆ պատրաստակամությունը` աջակցել հակամարտության «համապարփակ կարգավորմանը» և առաջնորդներին կոչ արեց շարունակել երկխոսությունը ԵԱՀԿ Մինսկի խմբի հովանու ներքո։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
