ԵՐԵՎԱՆ, 30 հունիսի — Sputnik, Արմենուհի Մխոյան. Գյումրիում Վալերի Պերմյակովի գործով հերթական դատական նիստը սկսվեց կես ժամ ուշացումով և ավարտվեց 30 րոպե անց՝ Ավետիսյանների իրավահաջորդների և նրանց շահերի պաշտպանների դժգոհությամբ։
Նախորդ դատական նիստի ժամանակ ընդունած քաղհայցը Շիրակի մարզի ընդհանուր իրավասության առաջին ատյանի դատարանը հունիսի 30-ի նիստին հրաժարվեց ընդունել:
Մայիսի 27-ին կայացած նախորդ նիստի ժամանակ ՌԴ-ի դեմ քաղհայց էր ներկայացվել: Քաղհայցի չափը՝ ընդհանուր 450 հազար եվրո գումար, որոշվել էր հաշվի առնելով մի շարք հանգամանքներ, այդ թվում այն, որ Պերմյակովի իրականացրած սպանությունների հետևանքով մահացել են Ավետիսյանների ընտանիքի 7 անդամները, նրանցից 2-ը` մանկահասակ երեխա:
Դատարանը նախորդ դատական նիստի ժամանակ քաղհայցն ընդունել էր, ավելին` մոտ մեկ ամիս ընդմիջում էր տվել՝ ՌԴ-ին ուղղված քաղհայցի թարգմանությունն ու հասցեատիրոջը ներկայացնելու համար: Այս նիստի ընթացքում ներկայացվեց քաղհայցը չընդունելու որոշումը։
«Ոչ նյութական վնասի փոխհատուցման վերաբերյալ քաղհայցը չի կարող հանդիսանալ Շիրակի մարզի առաջին ատյանի դատարանի կողմից քննվող գործի առարկա՝ դատարանը մերժում է ընդունել քաղաքացիական հայցվորներ, տուժողների իրավահաջորդներ՝ Լուսինե Ավետիսյանի, Անահիտ Կոշտոյանի, Անդրանիկ Պողոսյանի և Նարինե Պողոսյանի կողմից 2016 թվականի մայիսի 27-ին Շիրակի մարզի առաջին ատյանի դատարան ներկայացրած հայցադիմումը»,-նշված է որոշման մեջ:
Ավետիսյանների իրավահաջորդների շահերի պաշտպան Լուսինե Սահակյանը դատարանին դիմեց 1 շաբաթով դատը հետաձգելու խնդրանքով՝ նշելով, որ այս ընթացքում կպատրաստվի դատավորի ինքնաբացարկի մասին միջնորդություն՝ հաշվի առնելով այն, որ դատարանը կայացրել է անհիմն որոշում:
«Անցած նիստի ժամանակ արդեն դատարանը քաղհայցն ընդունել էր և 1 ամիս տրամադրել այդ քաղհայցը թարգմանելու և հասցեատիրոջը ներկայացնելու համար, մինչդեռ այսօր ներկայացվում է մեկ այլ որոշում՝ ինչի իրավունքը դատարանը չուներ: Սա ակնհայտ անհիմն որոշում է, որի իրավունքը դատարանը չուներ։ Այս 1 ամսվա ընթացքում լուրջ փոփոխություն է տեղի ունեցել, և ինչ-որ մեկը որոշել է, որ պետք է որոշում գրի»,- նշեց Լուսինե Սահակյանը լրագրողների հետ ունեցած ճեպազրույցի ժամանակ՝ չհերքելով այն փաստը, որ հնարավոր է, որ նույն քաղհայցով դիմեն Եվրադատարան, սակայն այս պարագայում, եթե մինչ այս հայցը ներկայացված էր Ռուսաստանի Դաշնության դեմ, ապա Եվրադատարանում իր վրա «պարտավորություն» կվերցնի և որպես պատասխանող կողմ ՌԴ-ի հետ կներկայանա նաև Հայաստանի Հանրապետությունը:
