ԵՐԵՎԱՆ, 29 հունիսի — Sputnik. Գերմանիայի բուհերում գերմաներեն ուսումնասիրող հայ ուսանողների թիվն ավելացել է, Երևանում կայացած ասուլիսի ժամանակ ասաց Գերմանիայի արտաքին գործերի նախարար, ԵԱՀԿ նախագահ Ֆրանկ Վալտեր Շտայնմայերը։
«Վերջին տարիներին ավելի մեծ թվով հայեր են մեկնում Գերմանիա կրթություն ստանալու նպատակով, և Հայաստանի քաղաքացիներին ավելի շատ կրթաթոշակներ են տրամադրվում»,- ասաց Շտայնմայերը։
Նրա խոսքով` հայ-գերմանական հարաբերություններն ակտիվորեն զարգանում են մարդասիրական ոլորտում։
Ըստ նրա` Գերմանիայի կառավարությունը բարձր է գնահատում հայկական կողմի այն ջանքերը, որոնք ուղղված են բարեփոխումների իրականացմանը, մասնավորապես` ընտրական համակարգի փոփոխություններին։
Շտայնմայերի խոսքով` Գերմանիան կողմ է, որ Եվրամիություն- Հայաստան հարաբերությունները խորանան, և ըստ նրա` Երևանի և Բրյուսելի հարաբերությունները չեն հակասում Հայաստանի և Ռուսաստանի հարաբերություններին։
Շտանմայերն անդրադարձավ նաև նախօրեին Թուրքիայում տեղի ունեցած ահաբեկչությանը, որը բազմաթիվ մարդկանց մահվան պատճառ է դարձել։ Գերմանիայի արտգործնախարարը ցավակցություն հայտնեց թուրքական ղեկավարությանը։
