ԵՐԵՎԱՆ, 29 հունիս — Sputnik. Ֆրանսիայի արտգործնախարար Ժան Մարկ Էյրոն իր ռուս գործընկեր Սերգեյ Լավրովի հետ Փարիզում կայացած հանդիպումից հետո հայտարարել է, որ Ֆրանսիան պատրաստ է հարթակ տրամադրել Լեռնային Ղարաբաղի շուրջ նոր բանակցություններ վարելու համար։
«Մենք նաև խոսեցինք Լեռնային Ղարաբաղում ստեղծված իրավիճակի մասին։ Սերգեյ Լավրովը տեղեկացրեց ինձ Ռուսաստանի նախագահ Վլադիմիր Պուտինի և Հայաստանի ու Ադրբեջանի նախագահների սանկտպետերբուրգյան բանակցությունների արդյունքի մասին։ Ես հիշեցրի, որ մենք պատրաստ ենք հարթակ տրամադրել Փարիզում կայանալիք նոր քննարկումների համար»,- ասել է Էյրոն։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
