ԵՐԵՎԱՆ, 29 հունիսի — Sputnik. Գագիկ Մինասյանը կարծում է, որ Ղարաբաղյան հակամարտությունը չի կարող ռազմական լուծում ունենալ, զինված գործողությունները միայն հեռացնում են լուծումը։
«Հակամարտության լուծման վերջին փորձը հաջողություն չունեցավ։ Այդ ռազմական արկածախնդրության ընթացքում հարյուրավոր հայ և ադրբեջանցի երիտասարդներ զոհվեցին։ Այդ ողբերգության լույսի ներքո այլևս կարևոր չէ, որ Ադրբեջանի կորուստները հինգ անգամ շատ էին, քան հայկական կողմինը։ Այդպես է եղել միշտ, այդպես էլ կլինի հետագայում։ Կարևորը` պետք է հասկանալ, որ Ղարաբաղյան հակամարտությունը ռազմական լուծում չունի»,- Սևծովյան տնտեսական համագործակցության խորհրդարանական վեհաժողովի 47-րդ նիստում ունեցած ելույթի ժամանակ ասել է Մինասյանը։
Նրա խոսքով` ռազմական գործողությունները միայն հեռացնում են Ղարաբաղյան հակամարտության կարգավորումը։
«Միակ ճանապարհը խաղաղ լուծումն է, որն, առաջին հերթին, ընկած է տնտեսական համագործակցության հարթությունում»,- ասել է նա։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
