ԵՐԵՎԱՆ, 29 հունիսի — Sputnik. Ռուսաստանի հետ ՀՕՊ միավորված համակարգի մասին համաձայնագիրը թույլ կտա Հայաստանին օգտագործել ռուսական կործանիչները, C-300 համակարգերը և ՌԴ օդատիեզերական ուժերի հետախուզական տվյալները, Հայաստանի հանրային հեռուստատեսության եթերում ասել է Հայաստանի պաշտպանության նախարար Սեյրան Օհանյանը։
Հայաստանի և Ռուսաստանի պաշտպանության նախարարներ Սեյրան Օհանյանը և Սերգեյ Շոյգուն 2015թ.-ի դեկտեմբերին ստորագրել են հավաքական անվտանգության կովկասյան տարածաշրջանում հակաօդային պաշտպանության (ՀՕՊ) միավորված տարածաշրջանային համակարգ ստեղծելու մասին համաձայնագիրը։ Օրինագիծը պետք է վավերացնի Հայաստանի ԱԺ-ն։
«Մենք Հայաստանի ՀՕՊ համակարգերի հնարավորությունների հետ մեկտեղ կարող ենք օգտագործել նաև Ռուսաստանի ռեսուրսները` անվտանգության տարածաշրջանային հարցերը լուծելու համար։ Կարողանալու ենք օգտագործել 4-րդ սերնդի ժամանակակից կործանիչները, C-300 համակարգերը, ինչպես նաև` հակահրթիռային պաշտպանության հնարավորությունները»,- ասել է Օհանյանը։
Նրա խոսքով` Հայաստանը կործանիչների հետ միասին կարող է օգտագործել Ռուսաստանի օդատիեզերական հետախուզական տվյալները։
Օհանյանն ընդգծել է` և՛ խաղաղ, և՛ մարտական գործողությունների ժամանակ ՀՕՊ համակարգի միջոցների և հայկական ուժերի կիրառումն իրականացնելու է Հայաստանի ՀՕՊ զորքերի և ավիացիայի հրամանատարությունը։
