ԵՐԵՎԱՆ, 29 հունիսի — Sputnik. Ռուսական վարկի շրջանակում Հայաստանի ձեռք բերած սպառազինության մի մասի առաքման գործընթացն արդեն սկսվել է, ասել է Հայաստանի պաշտպանության նախարար Սեյրան Օհանյանը։
«Պայմանագրերի 80 տոկոսն արդեն ստորագրված է։ Մնացածն արագ կկնքվի։ Առաքումների համար նախապատրաստական աշխատանքներն անցկացված են։ Համապատասխան ընկերություններում արդեն տեղի է ունենում սպառազինության մի մասի նախապատրաստություն, ինչ-որ մի մասի մատակարարումն արդեն սկսվել է»,- ասել է նախարարը։
Նա դիմել է բնակչությանը` նշելով, որ երկրի ռազմաքաղաքական ղեկավարությունն ամեն ինչ անում է ռուսական վարկի շրջանակում առաքումների տեմպերն արագացնելու և ժամանակի ընթացքում բացթողումներ թույլ չտալու համար։
«Վարկի տրամադրումը և դրա շրջանակում գործընթացներն իրականացվում են համապատասխան ժամկետներում։ Բարձր մակարդակի հանդիպումներ են անցկացվել, բոլոր պայմանավորվածություններն իրագործվում են ժամանակացույցի համաձայն։ Նման պայմանագրերն արագ չեն կնքվում, քանի որ պահանջում են միջպետական քննարկումներ։ Բացի այդ, կանխիկ միջոցներով ձեռք բերելը մի բան է, պետական վարկի միջոցներով գնելը` մեկ այլ բան»,- ասել է նա։
Հայաստանի կառավարությունն ապրիլի 15-ին հաստատել է ՌԴ կառավարության հետ համաձայնագրի դրույթների իրագործման մասին որոշման նախագիծը` ռազմական նշանակության արտադրանքի առաքումները ֆինանսավորելու նպատակով Երևանին 200 մլն դոլարի պետական արտահանման վարկ տրամադրելու վերաբերյալ։
Համապատասխան համաձայնագիրը ստորագրվել է Երևանում 2015 թ-ի հունիսի 26-ին, սակայն երկար ժամանակ մնացել է թղթի վրա։
Պատասխանելով Հայաստանի անվտանգության համակարգում ՀԱՊԿ դերի մասին հարցին` Օհանյանը նշել է, որ դեմ է ցանկացած առիթով ՀԱՊԿ-ին դիմելուն։
«Ինչու՞ դիմենք ՀԱՊԿ-ին, այդ դեպքում ինչի՞ համար է սեփական բանակը։ Ինչո՞ւ դիմել ՀԱՊԿ-ին, եթե մենք ունենք տարածաշրջանում մարտունակ արցախյան բանակ, որը կատարում է իր առջև դրված խնդիրները»,- ասել է նախարարը։
ՀԱՊԿ-ի անդամներն են Հայաստանը, Բելառուսը, Ղազախստանը, Ղրղըզստանը, Ռուսաստանը և Տաջիկստանը։
