ԵՐԵՎԱՆ, 29 հունիսի — Sputnik. Լեռնային Ղարաբաղում իրավիճակը ցանկացած պահի կարող է կրկին սրվել, Հայաստան, Ադրբեջան և Վրաստան կատարելիք եռօրյա այցից առաջ ասել է Գերմանիայի արտգործնախարար Ֆրանկ Վալտեր Շտայնմայերը։ Այս մասին նշված է ԵԱՀԿ կայքում։
«Ղարաբաղյան հակամարտությունը ցանկացած պահի կարող է կրկին սրվել»,- ասել է Շտայնմայերը։
Նա նշել է, որ Եվրոպայում տեղի ունեցող իրադարձությունների լույսի ներքո չի կարելի աչքաթող անել Հարավային Կովկասի իրավիճակը։
«ԵԱՀԿ-ում Գերմանիայի նախագահության տարում մենք պարտավոր ենք հնարավորին չափ նվազագույնի հասցնել այս վտանգը` հրադադարի, վստահության միջոցների ամրապնդման և բանակցություններ սկսելու հաշվին»,- ասել է Շտայնմայերը։
Տարածաշրջանային այցի շրջանակում ԵԱՀԿ գործող նախագահը կայցելի նաև Ադրբեջան և Վրաստան։
