Լաուրա Սարգսյան, Sputnik.
«Ոսկե ծիրան» միջազգային XIII կինոփառատոնի կազմակերպիչները երեք շաբաթ շարունակ գաղտնի էին պահում, թե ովքեր են լինելու փառատոնի հիմնական հյուրերի անունները։ Եվ միայն այսօր, մամուլի ասուլիսի ժամանակ վերջապես հրապարակեցին այդ անունները։
«Ոսկե ծիրանի» այս տարվա պատվավոր հյուրը կլինի բրիտանացի կինոաստղ Ժակլին Բիսեթը, որին 2010 թվականին Ֆրանսիայի նախկին նախագահ Նիկոլյա Սարկոզին կոչել էր կինոյի խորհրդանիշ։ Փառատոնը կհյուրընկալի նաև հայտնի ռեժիսոր Ժիլիմիր Ժիլնիկին։
«Բիսեթը Երևանում կներկայացնի իր հետահայաց ցուցադրությունը։ Կինոաստղի ֆիլմերից մենք ընտրել ենք երեք ֆիլմ, և յուրաքանչյուր ոք կարող է ֆիլմերը դիտել նրա ներկայությամբ», — լրագրողների հետ հանդիպման ժամանակ ասաց փառատոնի միջազգային բաժնի ղեկավար Տաթևիկ Մանուկյանը։
Անկախ նրանից, որ այս տարի ֆինանսական ճգնաժամն իր ազդեցությունն ունեցել է ոչ միայն բնակչության, այլև փառատոնի վրա, այնուամենայնիվ, մի շարք կինոաստղեր Երևան կայցելեն։ Պարզապես Սպենդիարյանի անվան օպերայի և բալետի ազգային ակադեմիական թատրոնի դահլիճի վարձակալության բարձր վճարի պատճառով այս տարի փառատոնի բացումը համեստ կլինի և կանցկացվի մայրաքաղաքի կինոթատրոններից մեկում։
«Մենք որոշեցինք խնայել միջոցները, և այդ գումարներով ավելի շատ պրեմիերաներ բերել», — ասաց կինոփառատոնի տնօրեն Հարություն Խաչատրյանը։
Նրա խոսքով` Ղարաբաղի իրադարձությունների պատճառով շատերը վախենում էին Հայաստան գալ, սակայն Հռոմի պապի այցը ոգեշնչեց մարդկանց ու ցրեց բոլոր մտավախությունները։
Երկար համոզելուց հետո ժյուրին կգլխավորի հայտնի կոմպոզիտոր Տիգրան Մանսուրյանը։
Հենց նրա ղեկավարությամբ գնահատականներ կտրվեն մրցութային ծրագրերում ներկայացված ֆիլմերին ու պրեմիերաներին։ Ֆիլմերի ցանկում են նաև իրանցի ռեժիսոր Մաջիդ Բարզեգարի «Ամենասովորական քաղաքացի» և ռուս ռեժիսոր Վիտալի Մանսկիի «Արևի շողերի տակ» և Ալեքսանդր Մինդաձեի «Սիրելի Հանս, թանկագին Պյոտր» ֆիլմերը։
Այս տարի տոմսերը հնարավոր կլինի գնել նաև առցանց, նույնիսկ` բջջային սարքերի միջոցով։
