ԵՐԵՎԱՆ, 29 հունիսի — Sputnik. Ռուսաստան հասնելու համար ցամաքայինից բացի կան նաև օդային ու ծովային ուղիներ, և հայ գործարարները լավ կանեն իրենց բեռները ՌԴ հասցնեն նաև այդ ուղիներով, քանի որ դեռ անհայտ է` ցամաքային ճանապարհը որքան ժամանակ փակ կմնա։ Այս մասին լրագրողներին հայտնեց Միջազգային տնտեսական ինտեգրման և բարեփոխումների նախարար, փոխվարչապետ Վաչե Գաբրիելյանը։
Նախապես արված հայտարարությունը, թե Վերին Լարսով երթևեկությունը վերականգնելը շուրջ 45 օր կտևի, փոխվարչապետը ո´չ հաստատեց, ո´չ էլ հերքեց։
«Մեր նախարարությունը, ԱԻՆ-ը, տրանսպորտի նախարարությունը գործում են և ամենօրյա կապի մեջ են իրենց գործընկերների հետ։ Կառավարությունը միջոցներ է ձեռնարկում, և այս ամենը գտնվում է վարչապետի ուշադրության, ամենօրյա հսկողության ներքո։ Իսկ թե երբ խնդիրը կհարթվի, զարգացումները ցույց կտան»,- ասաց փոխվարչապետը։
Առայժմ հայտնի չէ նաև ճանապարհի փակ լինելու և արտահանման դադարեցման հետևանքով ՀՀ գյուղատնտեսության ոլորտի կրած վնասի չափը։
«Այս պահին գնահատականները ճշտվում են»,- ասաց նա։
Լրագրողների հիշեցմանը, թե Հայաստանի համար տնտեսական կարևոր նշանակություն ունեցող ճանապարհն ամեն տարի, հատկապես պտուղ-բանջարեղենի արտահանման սեզոնին փակվում է փլուզումների հետևանքով, Գաբրիելյանն արձագանքեց, թե դրանում որևէ մեկի մեղավորությունը չի տեսնում։
«Փլուզումները կախված են երկրաբանությունից և տեղանքից, դրանց վրա չեմ կարծում, թե որևէ մեկն ազդեցություն ունի, և չեմ կարծում, որ դա որևէ կերպ կառավարվող պրոցես է»,- ասաց Գաբրիելյանը։
Նա միաժամանակ հավելեց, որ ճանապարհի հիմնանորոգումը կարժենա 100 միլիոնավոր դոլարներ, և ՌԴ-ն այժմ այս ճանապարհի համար նման ծախսեր անելու մտադություն չունի։
«ՌԴ-ն նման ծախսեր անելու տեսակետից իր առաջնահերթություններն է որոշում, և այդ առաջնահերթությունների ընդհանուր սկզբունքի մեջ ճանապարհի անընդհատ վերանորոգումն ու ապահովումը կա, ուղղակի նոր ռազմավարական լուծումներ տալ և մի քանի 100 միլիոն դոլարի ծախս անել, որպեսզի ճանապարհն էապես ընդլայնվի, այդպիսի որոշումներ չեն կայացվել, և ՌԴ-ում էլ այս պահին առաջնահերթությունների խնդիրներ կան»,- ասաց ՀՀ փոխվարչապետը։
Ինչ վերաբերում է ՀՀ-ից ՌԴ արտահանումներին, ապա Վաչե Գաբրիելյանը հիշեցրեց, որ դրանք հնարավոր է իրականացնել նաև ծովային ու օդային ճանապարհներով:
Վերին Լարսի անցակետն արդեն շուրջ մեկ շաբաթ փակ է Թերեք գետի մակարդակի բարձրացման հետևանքով առաջացած ջրածածկման վտանգի, ինչպես նաև քարաթափման հետևանքով։
