ԵՐԵՎԱՆ, 28 հունիսի — Sputnik. Ռուսաստանի արտգործնախարար Սերգեյ Լավրովն իր ֆրանսիացի գործընկեր Ժան Մարկ Էրոյի հետ չորեքշաբթի կքննարկի ղարաբաղյան հակամարտության կարգավորման հարցը, ճեպազրույցի ժամանակ հայտնել է ՌԴ ԱԳՆ պաշտոնական ներկայացուցիչ Մարիա Զախարովան։
Նա նշել է, որ հանդիպումը տեղի է ունենալու Ռուսաստանի արտգործնախարարի` Փարիզ այցի շրջանակում։
«Լեռնային Ղարաբաղում ապրիլի սկզբին բռնկված գործողությունների կապակցությամբ նախարարները կքննարկեն հետագա քայլերը, որոնք պետք է համաձայնեցնեն երկու երկրների արտգործնախարարությունները` որպես ԵԱՀԿ ՄԽ համանախագահող երկրներ, հաշվի առնելով այն պայմանավորվածությունները, որոնք ձեռք են բերվել մայիսի 16-ին Վիեննայի գագաթնաժողովում և հունիսի 20-ին Սանկտ Պետերբուրգում տեղի ունեցած եռակողմ հանդիպման ժամանակ», — ասել է Զախարովան։
Նա ավելացրել է, որ այս թեման, որը հասկանալի պատճառներով հետաքրքիր էր շատերին, այդ թվում տարածաշրջանային լրագրողներին, «մնում է ԵԱՀԿ ՄԽ անդամ գործընկերների հետ շփումների օրակարգում, որի մասին մենք կանոնավոր պատմել ենք և պատմելու ենք»։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
