ԵՐԵՎԱՆ, 27 հունիսի-Sputnik. Հունիսի 27-ին Երևանում կայացել է հայ-ամերիկյան տնտեսական համագործակցության միջկառավարական հանձնաժողովի միջնաժամկետ հանդիպումը ՀՀ փոխվարչապետ, միջազգային տնտեսական ինտեգրման և բարեփոխումների նախարար, հանձնաժողովի հայկական մասի համանախագահ Վաչե Գաբրիելյանի և ԱՄՆ փոխպետքարտուղարի` Եվրոպայի ու Եվրասիայի հարցերով փոխտեղակալ, հանձնաժողովի ամերիկյան մասի համանախագահ Բրիջիթ Բրինքի գլխավորությամբ, հաղորդում է Հայաստանի կառավարության մամուլի ծառայությունը:
«Վաչե Գաբրիելյանը նշել է, որ երկու կողմերն ակտիվ աշխատանքներ են տարել ֆինանսական, Հայաստանի էներգետիկ ոլորտի դիվերսիֆիկացման, քաղաքացիական ավիացիայի ոլորտում բարեփոխումների («բաց երկնքի» քաղաքականության), ինչպես նաև կոռուպցիայի դեմ պայքարի հարցերում: Բրինքը նշել է, որ իր ուշադրությունը բևեռված է տնտեսական կապերի խորացման ուղիների վերհանման, ԱՄՆ աջակցության հասցեականության, հետագա երկկողմ առևտրի ու ներդրումների և Հայաստանում շուկայական բարեփոխումների խորացման վրա»,- ասվում է հաղորդագրությունում:
Հայ-ամերիկյան տնտեսական համագործակցության միջկառավարական հանձնաժողովի նախորդ նիստը կայացել է Երևանում 2015 թ-ի նոյեմբերին:
Կողմերը պայմանավորվել են միջկառավարական հանձնաժողովի հաջորդ նիստն անցկացնել այս տարվա վերջին Վաշինգտոնում:
