ԵՐԵՎԱՆ, 27 հունիսի — Sputnik. Համաժողովի գլխավոր նպատակը երկու երկրների մարդասիրական համագործակցության ամրապնդումն է: Նախատեսվում է, որ բանավեճերի ընթացքում մասնակիցները ձեռք կբերեն պայմանավորվածություններ՝ ուղղված ռուս-հայկական երիտասարդական համագործակցության զարգացմանը, և պայմաններ կստեղծվեն գիտության, տնտեսության և սոցիալ-մշակութային ոլորտներում երկկողմ նախագծերի ձևավորման համար:
«Մենք կանոնավոր կերպով մասնակցում ենք միջազգային համաժողովների, դա փորձի, գիտելիքների փոխանակում է: Հնարավոր է՝ մեզ հաջողվի որոշակի պայմանավորվածություններ ձեռք բերել»,- Sputnik-ին ասաց «Փրկարարների ռուսական ուսանողական կորպուս» երիտասարդական կազմակերպության ղեկավարի տեղակալ Ելիզավետա Մոսկովինան:
«Հիմա ավելի կարևոր է կենդանի շփումը, հաղորդակցությունները, անձնական ծանոթությունները: Թվային տեխնոլոգիաների դարում լավ փոխհարաբերությունները հարցերն ավելի արագ են լուծում, քան 10 պաշտոնական հարցումները: Ուսանողներն իրենց մակարդակում կարող են գաղափար ներկայացնել և հանդես գալ նախաձեռնությամբ բարձրագույն մակարդակում՝ առաջարկելով այն նրանց, ովքեր օրենսդրական մակարդակում որոշումներ են ընդունում: Ռուսական պատվիրակության անդամներն ընտրվել են ողջ Ռուսաստանից»,- ասել է համաժողովի մասնակիցը:
«Երիտասարդությունից է կախված, թե ապագայում դեպի ուր կշարժվեն մեր երկրները: Պետք է բարեկամական երկխոսություն հաստատել բոլոր մակարդակներում: Երիտասարդության մոտ արդեն հիմա հայտնվում են քաղաքական, տնտեսական, դիվանագիտական, սոցիալական կապեր»,- կարծում է համաժողովի կազմկոմիտեի ներկայացուցիչ Իվան Տարականովը:
«Ռուսաստանի հայերի միություն» համառուսաստանյան հասարակական կազմակերպության փոխնախագահ Լևոն Մուքանյանի խոսքով՝ Հայաստանի և Ռուսաստանի միջև միշտ եղել են բարեկամական հարաբերություններ ինչպես երկկողմ մակարդակում, այնպես էլ ԵՏՄ և ՀԱՊԿ կառույցների շրջանակում:
«Դարեր շարունակ մենք երբեք չենք պատերազմել, ինչը լուրջ հիմք է ապագայում հարաբերությունների զարգացման համար: ԵՏՄ ընդլայնման շրջանակում նախատեսվում է ապրանքաշրջանառության լուրջ աճ, տնտեսական ծրագրերի, ռազմական համագործակցության, մեր երկրների միջև անվտանգության ծրագրերի ավելացում: Դեռ Սուվորովն է ասել, որ Հայաստանը Ռուսական կայսրության հարավային վահանն է: Բայց մեր նախագահների և կառավարությունների միջև բոլոր պայմանավորվածությունները պետք է ամրագրվեն հասարակական կապերով, այլապես դրանք կմնան թղթի վրա զուտ որպես գեղեցիկ ձևակերպում»,- ասել է Մուքանյանը:
«Քաղաքացիական փոխհարաբերությունների ամրապնդումն այն է, ինչով մենք զբաղվում ենք համաժողովի ընթացքում: Այդ ամրապնդման մեջ երիտասարդությունը կարևոր օղակ է: Երիտասարդության աշխարհայացքը, միմյանց հետ շփումը որոշիչ գիծ կդառնա մոտ ապագայի ծրագրավորման հորիզոնում: Առայժմ մենք տեսնում ենք, որ կա հարաբերությունների ամրապնդման հիմք, բայց այն պետք է փոքրիկ ծառի նման անընդհատ ջրվի»,- նշել է Մուքանյանը:
«Գաղտնիք չէ, որ Արևմուտքը Հայաստանում ֆինանսավորում է հակառուսական գործունեություն: Այդ մարտահրավերներին դիմակայելու համար պետք է, որպեսզի մեր երիտասարդությունը տարբերի սևը սպիտակից: Մենք կրթված և ինտելեկտուալ երիտասարդություն ունենք: Համաժողովում կքննարկվեն նախագծեր կրթության, մշակույթի, զանգվածային հաղորդակցությունների, պատմական փաստերի խեղաթյուրմանը հակազդելու ոլորտներում»,- ասել է Մուքանյանը:
«Մենք շատ տաղանդներ ունենք, բայց նրանց շատ գաղափարներ չեն իրագործվել, որովհետև ռեսուրսները չեն բավականացնում: Դա Հայաստանի և Ռուսաստանի ընդհանուր խնդիրն է: Ռեսուրսները պետք է ապահովեն ավագ ընկերները»,- եզրափակել է Մուքանյանը:
Համաժողովի կազմակերպիչներն են Ռուսաստանի Երիտասարդական և մանկական միավորումների ազգային խորհուրդը և Ռյազանի Եսենինի անվան պետական համալսարանը` ՌԴ կրթության և գիտության նախարարության, Երիտասարդության հարցերի դաշնային գործակալության, ՀՀ սպորտի և երիտասարդության հարցերի նախարարության աջակցությամբ:
Միջոցառման գործընկերներն են «Երիտասարդական միջոցառումների իրագործման կենտրոն» ՊՈԱԿ-ը, Ռուս-հայկական երիտասարդական միությունը, Հայաստանի բարեկամության ռուսական միությունը և «Ռուսաստանի հայերի միություն» ՍՊԸ-ն:
