ԵՐԵՎԱՆ, 27 հունիսի — Sputnik. «Ոսկե ծիրան» երևանյան միջազգային կինոփառատոնի տնօրեն, վավերագրող ռեժիսոր Հարություն Խաչատրյանը պարգևատրվել է Ռուսաստանի հայերի միության «Արծաթե խաչ» շքանշանով, հաղորդում է Sputnik-ի թղթակիցը:
Շքանշանի հանձնումը կայացել է այս օրերին Մոսկվայում ընթացող միջազգային կինոփառատոնի շրջանակում «Փակուղի» վավերագրական ֆիլմի ցուցադրությունից հետո:
ՌՀՄ փոխնախագահ Լուսիկ Ղուկասյանը շնորհակալություն է հայտնել ռեժիսորին վավերագրական ֆիլմի համար և հավելել, որ «Ոսկե ծիրան» կինոփառատոնի շնորհիվ հայերին ընկալում են որպես «բարձր մշակութային, ինտելեկտուալ և մարդկային պոտենցիալով ազգ»:
««Փակուղի» ֆիլմը, ինչպես նաև շատ այլ կինոնկարներ, բավական դեպրեսիվ է, և զարմանալի է, թե ինչպես է նման մոտեցմամբ Խաչատրյանը ստեղծել այնպիսի դրական երևույթ, ինչպիսին է «Ոսկե ծիրանը», որն արդեն դարձել է Հայաստանի բրենդը: Այս պարգևի մակարդակն այժմ ավելի բարձր է, քան կարելի է ենթադրել: Հայերի միությունը գնահատում է Ձեր աշխատանքը և հայրենիքի հանդեպ սերը»,- ասել է ՌՀՄ ներկայացուցիչը:
Խաչատրյանի «Փակուղի» կինոնկարը երկրորդն է հայ ներգաղթյալների մասին վավերագրական ֆիլմաշարում, ովքեր երջանիկ կյանքի ակնկալիքով լքել են հայրենիքը: Ռեժիսորը նկարել է հայկական հեռուստատեսության համար, որպեսզի հորդորի հայրենակիցներին, չնայած բարդություններին, մնալ Հայաստանում: Սակայն ավելի ուշ պարզվել է, որ լոկալ թեման հոգեհարազատ է նաև այլ ժողովուրդներին: Հայ ռեժիսորի աշխատանքներն արժանացել են կինոքննադատների դրական գնահատականին, ողջ աշխարհում ցուցադրվում են նրա ֆիլմերը:
