ԵՐԵՎԱՆ, 27 հունիսի — Sputnik. Մեկնաբանելով հունիսի 16-18-ը Սանկտ Պետերբուրգում կայացած տնտեսական համաժողովում Հայաստանի համեստ մասնակցությունը` Sputnik Արմենիայի հետ զրույցում վերլուծաբան Արմեն Խանբաբյանն ասաց, որ Հայաստանը համաշխարհային տնտեսության, շուկայի հետ կապվում է ԵՏՄ-ի միջոցով։
«Այնպես որ ես չեմ զարմանում, որ Հայաստանն այլ ձևով չէր ներկայացված այդ ֆորումում, և չեմ զարմանում, որովհետև միևնույն է` որքան էլ այլ երկրները ցանկանան մեզ հետ տնտեսական համագործակցություն զարգացնել, նրանք դա պետք է անեն ԵՏՄ-ի միջոցով»,- ասաց նա։
Արմեն Խանբաբյանը նույն տեսակետից է մեկնաբանում նաև այն փաստը, որ սանկտպետերբուրգյան համաժողովում ստորագրված համագործակցության ավելի քան 300 փաստաթղթերից որևէ մեկի տակ Հայաստանի ներկայացուցչի ստորագրությունը չի դրվել։
«Եթե Հայաստանը որևէ փաստաթղթի տակ չի ստորագրել, ուրեմն կարիք չի եղել ստորագրելու,-ասաց մեր զրուցակիցը։- Եթե Հայաստանն ասեր` այսինչ փաստաթղթի տակ ես էլ եմ ուզում ստորագրել, ո՞վ կասեր` չէ։ Հակառակը` կասեին` բարով եկաք, կընդգրկեին և այլն»։
Ինչ վերաբերում է սանկտպետերբուրգյան գործընթացի նկատմամբ ՀՀ իշխանությունների վերաբերմունքի շուրջ հնչող քննադատական տեսակետներին, Արմեն Խանբաբյանը կարծում է, որ դա տեղավորվում է երկրի իշխանությունների նկատմամբ համատարած անվստահության համատեքստում։
«Դա մեծ խնդիր է Հայաստանի և՛ իշխանությունների, և՛ ժողովրդի համար։ Ժողովուրդը պետք է, չէ՞, հավատա իր իշխանություններին, որոնց, համարվում է, որ ինքն է ընտրել»,- ասաց նա։
Իսկ անվստահության հիմքում, նրա կարծիքով, ՀՀ կարծրացած քաղաքական համակարգն է` նույն քաղաքական ու կուսակցական դեմքերով։ «Երևի պետք է սերնդափոխություն լինի, գան նոր դեմքեր` և՛ ընտրվողների, և՛ ընտրողների»,- ասաց Խանբաբյանը` ավելացնելով, որ երկրի ապագան երիտասարդ սերնդին վստահելու գործընթացն, այնուամենայնիվ, որոշ բնագավառներում արդեն սկսված է։
