ԵՐԵՎԱՆ, 26 հունիսի — Sputnik, Դավիթ Գալստյան. Հռոմի պապին տեսնելու ցանկություն ունեցող հավատացյալները Խոր Վիրապ տանող ճանապարհի մի քանի կիլոմետրը ստիպված էին հաղթահարել ոտքով, այն էլ` կիզիչ արևի տակ։
Հռոմի Սրբազան քահանայապետ Ֆրանցիսկոս պապի հայաստանյան այցի վերջին հանգրվանը Խոր Վիրապի վանքն էր:
Վանքից մի քանի կիլոմետր այս կողմ ճանապարհը փակ էր հասարակ մարդկանց ավտոմեքենաների համար։ Ժողովուրդը վանք հասնելու համար ստիպված էր քայլել գրեթե ծառազուրկ բաց ճանապարհով ու երազել մի կում ջրի մասին։
![Папа Римский Франциск I в Хор Вирапе Папа Римский Франциск I в Хор Вирапе - Sputnik Արմենիա](https://cdn.am.sputniknews.ru/img/405/11/4051138_0:0:1600:1067_600x0_80_0_0_74bc5c90e85fa76f6f2e25600b0aca95.jpg)
Կարելի է ասել` այդ ճանապարհն ինքնատիպ ուխտագնացություն դարձավ հարյուրավոր մարդկանց համար, որոնք հավաքվել էին ճանապարհի մոտ` հույս ունենալով գեթ մի ակնթարթ տեսնել ավտոմեքենայով անցնող Պապին։
Մոտակայքում բնակվողներն ու երկար ճանապարհ կտրած, Խոր Վիրապ հասած հյուրերը կեսօրից դեռ մի քանի ժամ շուտ էին սկսել հավաքվել։ Մարդիկ պատսպարվել էին ճամփեզրի ծառերի տակ ու սպասում էին… Տարեցները, երեխաները, հղի կանայք եկել էին Հռոմի պապի օրհնությունը ստանալու հույսով։
«Անվտանգության միջոցների» դրսևորումներն ու ջրի բացակայությունը իրենց գործն արեցին. Պապի ժամանելուց առաջ ոմանց ինքնազգացողությունը վատացավ, և նրանց ուշքի բերեցին Շտապօգնության մեքենայում։
![Папа Римский Франциск I в Хор Вирапе Папа Римский Франциск I в Хор Вирапе - Sputnik Արմենիա](https://cdn.am.sputniknews.ru/img/405/09/4050975_0:0:1200:760_600x0_80_0_0_3ccad44893023cbc603af02044b2717f.jpg)
Մի տհաճ դեպք էլ եղավ այն պահին, երբ Պապը վանքին էր մոտենում։ Նա իր սովորության համաձայն` նստած էր «Renault»-ի հետևի նստատեղի աջ կողմում, ձեռքը դուրս էր հանել, որպեսզի ողջունի հավաքվածներին, սակայն աջ կողմում մարդիկ չկային. ոստիկանությունը «ջանացել» էր, որ մարդիկ հավաքվեն հակառակ կողմում։ Ստիպված եղավ իջեցնել պատուհանն ու մարդկանց ձեռքով անել ավտոմեքենայի սրահից։
Հռոմի պապի հայաստանյան այցի վերջին օրը երկու Հովվապետերը մոմ վառեցին Սուրբ Գրիգոր Լուսավորիչ եկեղեցում, այնուհետև ուղղվեցին դեպի վանքի գլխավոր Սուրբ Աստվածածին եկեղեցի: Հռոմի պապի և Վեհափառի խաղաղության աղոթքից հետո Գևորգյան հոգևոր ճեմարանի երգչախումբը երգեց «Լերինք ամենայն» շարականը, որի հնչյունների ներքո երկու Հովվապետներն ուղղվեցին դեպի բիբլիական Արարատ լեռը նայող դիտահարթակ:
Այս ամենը մարդիկ, իհարկե, չտեսան։ Տեսան միայն աղավնիներին, որոնք հայտնվեցին այն ժամանակ, երբ Պապը մտավ եկեղեցի։
![Папа Римский Франциск I в Хор Вирапе Папа Римский Франциск I в Хор Вирапе - Sputnik Արմենիա](https://cdn.am.sputniknews.ru/img/405/08/4050822_0:0:1200:814_600x0_80_0_0_2203aa6b12be1f82c424c16ed55048d9.jpg)
Պապի շարասյունը հետդարձի ճանապարհը բռնեց։ Այդ պահին դեպի վանք տանող ճանապարհով միջին տարիքի մի կին էր անցնում ամուսնու հետ։ Նրանք մի քանի հարյուր մետր հեռու էին մնացել մյուսներից։
Պապի մեքենան տեսնելով` կինն ինքնամոռաց սկսեց ձեռքով անել` փորձելով գրավել Սրբազան Քահանայապետի ուշադրությունը։ Պապը ձեռքով արեց հենց նրան։
Կնոջը նայելիս կարելի էր հասկանալ, թե ինչ է իսկական երջանկությունը…
![Папа Римский Франциск I в Хор Вирапе Папа Римский Франциск I в Хор Вирапе - Sputnik Արմենիա](https://cdn.am.sputniknews.ru/img/405/08/4050899_0:55:1599:1061_600x0_80_0_0_6c7a56409a83146b7e98df077df7b658.jpg)
![Папа Римский Франциск I в Хор Вирапе Папа Римский Франциск I в Хор Вирапе - Sputnik Արմենիա](https://cdn.am.sputniknews.ru/img/405/10/4051057_0:61:1599:1067_600x0_80_0_0_6cefceaeb86815a0752baf6ee7fa7c9b.jpg)