ԵՐԵՎԱՆ, 26 հունիսի — Sputnik. Հռոմի Ֆրանցիսկոս պապի ուխտագնացությունը Հայաստան պատմական իրադարձություն էր մեր երկրի և ժողովրդի համար: Երեք օր ողջ աշխարհի ուշադրությունը բևեռված էր աշխարհում առաջինը քրիստոնեությունը պետականորեն ընդունած Հայաստանի վրա: Այս մասին նշված է ՀՀ ոստիկանության պետ, գեներալ-լեյտենանտ Վլադիմիր Գասպարյանի հայտարարության մեջ։
«Երեք օր արվեց առավելագույնը՝ պապական այցի պատմական ոգին և քրիստոնեական շունչը լիասիրտ առնելու և աշխարհին վերադարձնելու համար: Ամեն ինչ արվեց մեր ժողովրդի, պետական ինստիտուտների, այն ծառայությունների կողմից, որոնք կոչված էին պահպանելու հասարակական կարգն ու անվտանգությունը»,- նշել է ոստիկանապետը:
Նրա խոսքով` այդ ծառայությունների թվում մեծ պատասխանատվություն էր դրված ՀՀ ոստիկանության վրա, և հանրապետության մայրաքաղաքում, Գյումրիում, Էջմիածնում, այլ վայրերում արձանագրային արտակարգ ծառայություն իրականացնող մեր ստորաբաժանումները լիարժեք ու պատվով կատարեցին խնդիրը:
![Владимир Гаспарян Владимир Гаспарян - Sputnik Արմենիա](https://cdn.am.sputniknews.ru/img/234/34/2343432_0:0:1000:818_600x0_80_0_0_3cbd8c7d974653e729f94c961c2b5c71.jpg)
Ոստիկանապետը շնորհակալություն է հայտնել ոստիկանության բոլոր այն ծառայողներին, որոնք պրոֆեսիոնալ կատարեցին իրենց պարտականությունները Հռոմի Ֆրանցիսկոս պապի այցելության օրերին՝ կրկին հավաստելով ապահով ու քաղաքակիրթ Հայաստանի իրողությունը:
«Շնորհակալություն մեր քաղաքացիներին՝ բոլոր միջոցառումները իրենցը համարելու, ցանկացած իրավիճակի ըմբռնումով մոտենալու և ծառայություն կատարող ոստիկաններին աջակցելու համար»,- ասել է ոստիկանապետը:
Գասպարյանի խոսքով` ուրախալի է, որ նման կարևորագույն իրադարձությունների ժամանակ ոստիկանության ու հանրության փոխըմբռնման և գործընկերության ավանդույթ է ձևավորվում, որը պետք է դառնա մեր ազգային նկարագրի մասը: