ԵՐԵՎԱՆ, 26 հունիսի — Sputnik. Նախօրեին Երևանի շենքերից մեկի պատուհանից ընկած 16-ամյա աղջիկը տեղափոխվել է «Սուրբ Գրիգոր Լուսավորիչ» բժշկական կենտրոն։
Աղջիկը հրաշքով փրկվել է, քանի որ, որոշ տվյալների համաձայն, ընկել է նույն շենքի երկրորդ հարկի դիմաց կառուցված տանիքի վրա։ «Սուրբ Գրիգոր Լուսավորիչ» բժշկական կենտրոնի Վերակենդանացման և ինտենսիվ թերապիայի բաժանմունքի վարիչ Սամվել Կարապետյանը աղջկա առողջական վիճակի մասին մանրամասներ է պատմել Sputnik Արմենիայի թղթակցին։
«Բարձրությունից ընկած աղջիկը բժշկական կենտրոն է բերվել «պոլիտրավմա» նախնական ախտորոշմամբ։ Հիվանդին հետազոտել են բոլոր նեղ մասնագետները` կրծքային վիրաբույժը, վիրաբույժը, նեյրովիրաբույժը։ Կատարվել են հակաշոկային միջոցառումներ, որի շնորհիվ հիվանդի վիճակը հնարավոր է եղել բարելավել», — նշեց Կարապետյանը։
Բժիշկի խոսքով` հիվանդի վիճակը գնահատվել է ծանր։
«Այժմ հիվանդի վիճակը գնահատվում է ծանր, բայց գիտակցությունը տեղն է, հիվանդը կարողանում է կոնտակտի մեջ մտնել, հրահանգները կատարել։ Շոկային վիճակից դուրս է եկել։ Նա կրծքավանդակի կողոսկրերի կոտրվածք ունի աջից և ձախից, վնասված են ստորին ծնոտն ու ողնաշարի 4-րդ ողը», — ավելացրեց նա։
Կարապետյանը նաև նշեց, որ դեռ դժվար է ասել, թե հիվանդը երբ կապաքինվի։ Առաջիկա օրերին հիվանդը կգտնվի վերակենդանացման բաժանմունքում, բուժումները կշարունակվեն առայժմ կոնսերվատիվ եղանակով։ Դեռ վիրահատական միջամտության ցուցում և կարիք չի նկատվում, անհրաժեշտության դեպքում բժիշկները կդիմեն վիրահատական միջամտության։
Ավելի վաղ որոշ ԶԼՄ-ներ հայտնել էին, որ աղջիկը պատուհանից ընկել է «սելֆի» անելու հետևանքով։
Sputnik Արմենիան հորդորում է զգոն և ուշադիր լինել։ Մի՛ վտանգեք ձեր և ձեր մտերիմների առողջությունը, եթե անգամ որոշել եք «սելֆի» անել թռչնի թռիչքի բարձրությունից։
