ԵՐԵՎԱՆ, 25 հունիսի — Sputnik. Վատիկանը և Թուրքիան լավ հարաբերություններ ունեն, Գյումրիում կազմակերպված ասուլիսի ընթացքում ասաց Վատիկանի մամուլի ծառայության տնօրեն Ֆեդերիկո Լոմբարդին։
«Ես չեմ կարծում, որ այստեղ պետք է լուրջ խնդիրներ տեսնել»,- ասաց Լոմբարդին` մեկնաբանելով Հռոմի պապի կողմից «ցեղասպանություն» բառն օգտագործելուց հետո Թուրքիայի հիվանդագին արձագանքին վերաբերող հարցը։
Նա նշեց, որ անցյալին անդրադարձ է արվում ոչ թե վերքերը թարմացնելու, այլ բացառապես փոխըմբռնման, երկխոսության և հաշտեցման սահմաններն ուրվագծելու համար։
Նրա կարծիքով` Հայաստանի նախագահը նույնպես հստակ ձևակերպումներ է ունեցել իր ելույթում և խոսել է խաղաղության ու հաշտեցման մասին։
«Եթե չեմ սխալվում, նա իր ելույթում «հանդուրժողականություն» բառն օգտագործել է նույն իմաստով, ինչ Հռոմի պապը։ Խոսքն ապագան կառուցելու մասին է, որը հաշտեցման, խաղաղության և ներդաշնակության ապագա կլինի»,- ասաց Լոմբարդին։
