ԵՐԵՎԱՆ, 25 հունիսի — Sputnik. Պատարագից հետո հավատացյալ ժողովուրդը շունչը պահած սպասում էր Պապի գործողություններին։ Ֆրանցիսկոս պապը, որպես երկու եկեղեցիների բարեկամության ևս մեկ ապացույց, պապամոբիլ հրավիրեց Գարեգին Բ-ին։ Հրապարակում Ամենայն Հայոց Կաթողիկոսի հետ շրջելուց հետո կանգնեցրեց պապամոբիլը, դուրս եկավ մեքենայից և մոտեցավ ժողովրդին։
Ժողովրդի հետ շփվելուց հետո Հռոմի պապը նստեց սպիտակ «Ռենոն» և շարժվեց դեպի Անարատ Հղության Հայ քույրերի միաբանության «Տիրամայր Հայաստանի» կուսաստան։ Այս անգամ Հռոմի պապին ուղեկցում էր Հայաստանի, Վրաստանի, Արևելյան Եվրոպայի հայ կաթողիկեների առաջնորդ Տեր Ռաֆայել արքեպիսկոպոս Մինասյանը։
Կուսաստանում Հռոմի պապը մի փոքր կհանգստանա, հետո կրկին կգա Գյումրու կենտրոնական հրապարակ, կայցելի ՀԱԵ Շիրակի թեմի աթոռանիստ Սուրբ Աստվածածին (ժողովրդին հայտնի «Յոթ վերք») եկեղեցի, ապա կլինի Հայաստանի, Վրաստանի և Արևելյան Եվրոպայի հայ կաթողիկեների աթոռանիստ Սրբոց Նահատակաց եկեղեցում։
Մինչ Ֆրանցիսկոս պապը մի փոքր հանգստանում է, այն հաջողակները, ովքեր հնարավորություն են ունեցել մոտիկից տեսնելու Սրբազան քահանայապետին, հիացմունքով պատմում են մյուսներին. «Հրաշք մարդ է, հրաշք հոոգևորական, տեսա՞ք` իջավ ու մոտեցավ ժողովրդին, ուրեմն մենք կարևոր ենք նրա համար»։ Իսկ կատակասեր գյումրեցիները վստահեցնում են. «Գյումրու ծննդատներում ծնվող տղոց անունները Հռոմ դնեն գը»։
