ԵՐԵՎԱՆ, 25 հունիսի – Sputnik. Հունիսի 25-ի գիշերը Շամշադինի բժշկական կենտրոնում մահացել է Լոռու մարզի Շնող գյուղում ծնված, սակայն Տավուշի մարզի Վերին Կարմիրաղբյուր գյուղում ժամանակավորապես բնակվող 17-ամյա Աստղիկ Հանիսյանը:
Ինչպես հայտնում է shamshyan.com-ը, Աստղիկը ծայրահեղ ծանր վիճակում հիվանդանոց էր տեղափոխվել երեկ՝ հունիսի 24-ին: Բժիշկները սուր կտրող-ծակող առարկայից ստացած 7-ից ավելի հարվածների հետքեր են հայտնաբերել նրա մարմնի վրա, այդ թվում՝ կրծքավանդակի ու որովայնի մասում:
Երեկ՝ հունիսի 24-ին, ոստիկանության Տավուշի մարզային վարչության աշխատակիցները այդ հանցագործությունը կատարելու կասկածանքով ոստիկանության Շամշադինի բաժին բերման են ենթարկել Վերին Կարմիրաղբյուր գյուղի բնակիչ 25-ամյա Արսեն Անանիայի Խոջոյանին:
Նա խոստովանել է, որ գյուղի «Ճակատի աղբյուր» կոչվող հատվածում Ա. Հանիսյանին դանակի հարվածներ է հասցրել ինքը։ Արսեն Խոջոյանը ձերբակալված է:
Shamshyan.com-ը հայտնում է, որ Ա. Խոջոյանն այն անձն է, որն ադրբեջանական կողմում էր հայտնվել 2014 թ. մարտի 7-ին և Հայաստան էր վերադարձվել ապրիլի սկզբին: Նա Մամիկոն Խոջոյանի ազգականն էր, որը կրկին 2014 թ. հունվարի 28-ին ադրբեջանական կողմում էր հայտնվել և Հայաստան էր վերադարձել մարտի 4-ին խոշտանգված վիճակում և մահացել:
