ԵՐԵՎԱՆ, 25 հունիսի — Sputnik. Գյումրիում կողք կողքի այս պահին Հռոմի պապի այցին են սպասում կաթողիկե և առաքելական եկեղեցիների հետևորդները։
Ամբողջ գիշեր բազում ուխտավորներ են ժամանել Գյումրի, հատկապես` հարևան Վրաստանի հայ կաթողիկե համայնքներից։ Եկել են նաև Ռուսաստանից, Ուկրաինայից, Սիրիայից, Իտալիայից։
Հրավիրատոմս ունեցողներն անհրաժեշտ հսկողական փուլերն անցնելուց հետո են մուտք գործում Վարդանանց հրապարակ, որտեղ մատուցվելու է պատարագ։ Աթոռներին նստելու հնարավորություն ունեն միայն VIP հրավիրատոմս ունեցողները, մյուսները արարողության ընթացքին հետևելու են հոտնկայս։ Ծիսակատարության ընթացքին շատերը հետևելու են նաև հրապարակին հարակից փողոցներում տեղադրված մեծ էկրանների միջոցով։ Բազմահազար հավատացյալները մեծ խանդավառությամբ են սպասում Սրբազան Քահանայապետի այցին։
