ԵՐԵՎԱՆ, 24 հունիսի — Sputnik. Հայաստանում աճել է թմրամիջոցներ օգտագործողների թիվը, եթե 2015թ.-ին ունեինք 5.357 թմրամիջոց օգտագործող, ապա 2016թ.-ին նրանց թիվը հասել է 5.828-ի, լրագրողներին ասաց հանրապետության գլխավոր նարկոլոգ Պետրոս Սեմերջյանը։
Ընդ որում, 5828 մարդուց 88-ը կանայք են, 11-ն` անչափահասներ, մյուսները` տղամարդիկ։ Նրանցից 36-ը ստացիոնար բուժում են ստանում։
«Թմրամոլության խնդիրն ամբողջ աշխարհին է վերաբերում, և ամենուրեք թմրամոլության ավելացման կայուն միտում է նկատվում, այդ թվում` նաև Հայաստանում։ Ինչ վերաբերում է վիճակագրությանը, ապա Երևանում պաշտոնապես գրանցված է 3007, Արմավիրի մարզում` 722, Կոտայքում` 542 թմրամոլ», — ասաց Սեմերջյանը` պատասխանելով Sputnik Արմենիայի հարցին։
Սակայն ինչպես նշում է Հայաստանի գլխավոր նարկոլոգը, սրանք վերջնական տվյալներ չեն, քանի որ երկրում ավելի մեծ թվով թմրամոլներ կան, պարզապես գրանցված չեն։
Սեմերջյանն ավելացրեց, որ Հայաստանում ամենից հաճախ կանեփի հիմքով պատրաստված թմրանյութեր են օգտագործում։
Նրա խոսքով` կարևոր է նաև հատուկ դասախոսություններ ու բացատրական աշխատանքներ անցկացնել ուսանողների և դպրոցականների համար, ինչը նույնպես կարող է ազդել թմրանյութեր օգտագործող անձանց թվի կրճատման վրա։
