ԵՐԵՎԱՆ, 23 հունիսի — Sputnik. Անզուգական ջազ կատարող Շարոն Քլարկն առաջին անգամ համերգով հանդես կգա Հայաստանում, Sputnik Արմենիային հայտնեց համերգի կազմակերպիչ Mezzo Production-ը։
Նրանց խոսքով` երգչուհին Հայաստանում առաջին անգամ է և հանդես է գալու Արամ Խաչատրյանի անվան համերգասրահում Արմեն Հյուսնունցի ղեկավարությամբ Պետական ջազ նվագախմբի հետ։
«Այս նախագծին աջակցել է ԱՄՆ դեսպանատունը և Հայաստանի ջազի ասոցիացիան», — ասաց Mezzo Production-ի ներկայացուցիչ Գայանե Պողոսյանը։
Բացի այդ` ջազի լեգենդը հուլիսի 3-ին վոկալի վարպետության դաս կանցկացնի երաժշտության, մասնավորապես ջազ երաժշտության բոլոր սիրահարների համար։
Այսօր Քլարկի անունը հայտնի է ամբողջ աշխարհում. նա մշտապես շրջագայում է` ելույթ ունենալով հեղինակավոր համերգասրահներում և միջազգային մրցանակներ ստանալով։ Նա հաղթել է ոչ միայն Ամերիկայի ջազ մրցույթներում և փառատոներւմ, այլև Եվրոպայում։
Ջազի փառահեղ վոկալիստը հիասքանչ ձայն և հմայք ունի։
Քլարկը, ով Berklee College of Music-ի շրջանավարտն է, նույն կերպ հմտորեն կատարում է ինչպես ջազ երաժշտություն, այնպես էլ բլյուզ, սոուլ և հոգևոր երաժշտություն։ Ինչպես ասում են ջազի քննադատները, նրա հիանալի կոնտրալտոն ի զորու է դյութել ցանկացած ունկնդրի։
