ԵՐԵՎԱՆ, 23 հունիսի — Sputnik. Ծայրահեղ ծանր վիճակում Երևան տեղափոխված Ռոլանդ Սահակյանի մոտ արդեն առողջական կայուն դինամիկա կա` դրական միտումներով։ Առողջապահության նախարար Արմեն Մուրադյանը հայտնեց, որ այսօր Ռոլանդին իջեցրել են բակ, որ մաքուր օդ շնչի։ Նախարարի վստահեցմամբ`վերակենդանացման բաժանմունքում գտնվող բոլոր զինծառայողներն էլ շուտով կապաքինվեն ու կտեղափոխվեն հիվանդասենյակներ։ Նա խոսեց նաև Համբուրգում բուժում ստացող Արման Լազգիյանի մասին։
«Ամեն օր կապ ենք պահպանում Համբուրգի հիվանդանոցի հետ, որտեղ Արմանը բուժում է անցնում։ Ակնկալիքներն են` հետագայում տեղափոխել նեղ մասնագիտացած հիվանդանոց, որի հետ ևս փորձում ենք կապ հաստատել։ Նաև տեղեկանք ենք վերցրել իրենցից, թե նրա առողջական վիճակի հետ կապված ինչ օպտիմալ ակնկալիք ունեն»,-ասաց Մուրադյանը։
Նախարար Մուրադյանի խոսքով` նույն դրական դինամիկան Արմանի մոտ ակնկալում էին նաև Հայաստանում։ Դա են վկայում գերմանացի բժիշկների թողած գրառումները։
«Չեմ կարծում, որ նրա առողջական վիճակի դրական դինամիկան կապված է բուժման վայրի հետ»,- ավելացրեց նա։
Նախարարը հույս հայտնեց, որ բարերարները ֆինանսական աջակցություն կցուցաբերեն արտերկրում բուժում ստացող զինծառայողին, քանի որ դրա կարիքը դեռ կլինի։ Նա միաժամանակ վստահեցրեց, որ ՀՀ-ում բոլոր հնարավոր միջոցառումները և բուժական օգնությունը պետական ծրագրի շրջանակում է կազմակերպվում։
