ԵՐԵՎԱՆ, 23 հունիսի — Sputnik, Անի Լիպարիտյան. Արևելագետ Եվգենի Սատանովսկու անունն ընդգրկվել է ադրբեջանական սև ցուցակում, սակայն Ադրբեջանի այդ որոշումն ընդհանրապես չի մտահոգել արևելագետին։ Այդ մասին Sputnik Արմենիային ասաց Մերձավոր Արևելքի ինստիտուտի նախագահ Եվգենի Սատանովսկին` մեկնաբանելով աղմկահարույց լուրը։
Ադրբեջանի ԱԳՆ-ն հունիսի 21-ին հայտարարել է, որ Ռուսաստանի քաղաքացի Եվգենի Սատանովսկու անունը ներառվել է սև ցուցակում։ Պատճառն այն է, որ Սատանովսկին առանց Ադրբեջանի իշխանությունների գիտության այցելել է Լեռնային Ղարաբաղ։
Երկրի օրենքների համաձայն` դա համարվում է պետական սահմանի խախտում և այդօրինակ խախտում կատարած անձն ինքնաբերաբար հայտնվում է սև ցուցակում։
«Բան չունեմ ասելու: Ադրբեջանի ԱԳՆ-ի որոշումն ինձ չի խանգարում, որ ադրբեջանական լոլիկ ուտեմ, եթե դրանք հայտնվել են աղցանում, չի խանգարում, որ դյուշբարա պատվիրեմ ու լսեմ Մուսլիմ Մագամաևի երգերը։ Ես լավ չեմ հասկանում՝ այդ որոշումն իմ ինչն է սահմանափակում», — ասաց Սատանովսկին։
Փորձագետը վստահեցնում է, որ անտարբերությամբ է վերաբերվում Ադրբեջանի որոշմանը։
«Ինչպե՞ս եմ ես դրան վերաբերվում։ Ոչ մի կերպ։ Ես չեմ պատրաստվում Ադրբեջան մեկնել. այնտեղ բիզնես չունեմ, նման ծրագրեր չունեմ, քանի որ սև ցուցակում եմ, և այնտեղ գնալ չեմ կարողանա։ Սև ցուցակը, որում ձեզ ներառում է Ադրբեջանի ԱԳՆ-ն, քաղաքականության ժառանգությունն է, որը ես ոչ այնքան խելացի եմ համարում: Պատճառը պարզ է. դա ցույց է տալիս, թե Բաքուն ինչպես է կորցրել Ղարաբաղը», — նշեց Սատանովսկին։
Նրա կարծիքով՝ գրեթե զրոյական է նաև հավանականությունը, որ Լեռնային Ղարաբաղը Ադրբեջանի կազմ կվերադառնա։ «Դե դա (սև ցուցակում ներառելը) ցանկացած երկրի իրավունքն է և տվյալ երկրի դիվանագետների՝ իրենց կանոնները կատարելու պարտականությունը։ Նրանք էլ այդպիսի կանոններ ունեն, ի՞նչ կարող ես անել։ Ադրբեջանի նախագահը պետք է փոխի այդ կարգը և այն մարդկանց, ովքեր սահմանել են դրանք։ Իսկ նա դժվար թե այդ քայլին դիմի, քանի որ հենց նա այս տարվա ապրիլին վերսկսեց այն պատերազմը, որը նրա հայրը սառեցրել էր 1994 թվականին: Նա ցույց տվեց, թե ըստ իր տեսլականի՝ ինչպիսին է աշխարհը», — ասաց Սատանովսկին։
Փորձագետը վստահեցրեց, որ սև ցուցակի հետ կապված ոչ այնքան հաճելի իրավիճակը որևէ կերպ չի անդրադառնա իր ադրբեջանցի ընկերների հետ ունեցած հարաբերությունների վրա։
«Եթե նրանք իսկական ընկերներ են, ինչո՞ւ պետք է որևէ բան փոխվի։ Օրինակ՝ վերջին 25 տարում Ռուսաստանի գլխավոր ֆինանսիստը ադրբեջանցի էր։ Ի՞նչ է, ես հիմա պետք է չշփվեի՞ նրա ու նրա ընտանիքի անդամների հետ։ Հրաշալի արտիստ, երգիչ ու դեսպան ունենք Մոսկվայում, մենք բոլորս նրան համակրում ենք։ Ես այլևս պետք է չնայե՞մ նրա մասնակցությամբ ֆիլմերը: Առավել ևս, որ նա խաղացել է իմ լավ ընկերներից մեկի` Յուլի Գուսմանի հետ։ Դժվար թե», — ավելացրեց նա։
Սատանովսկին նաև նշեց. «Մենք հասկանում ենք, որ կան քաղաքական խնդիրներ և ներկայիս պաշտոնական Բաքվի կողմից ոչ հստակ գիտակցում, թե ինչպես է կառուցված աշխարհը։ Սակայն դա իրենց խնդիրն է, ես ոչինչ անել չեմ կարող»։ Արևելագետը նաև ավելացրեց, որ վերջերս է վերադարձել Ղարաբաղից և, եթե ժամանակ ունենա, ապա նորից կայցելի։
