ԵՐԵՎԱՆ, 22 հունիսի — Sputnik, Արմենուհի Մխոյան. Աշուղներ Շերամի ու Ջիվանու արձանների «վիրահատական» գումարների մի մասը «փակվել» է ԱՊՊԱ-ով: Հումորասեր գյումրեցիներն ասում են՝ «լավ է` աշուղներն էլ Հռոմի պապին իրենց աչքով կտեսնին»:
Գյումրիում մարտի 13-ի գիշերը տեղի ունեցած ավտովթարի հետևանքով տապալված աշուղներ Ջիվանուն և Շերամին նվիրված արձանախումբն արդեն վերականգնված է: Պատահարի հետևանքով գյումրեցի քանդակագործ Արտուշ Պապոյանի աշխատանքը լուրջ վնասներ էր կրել ու դեֆորմացվել:
«Օպել» մակնիշի մեքենան բախվել էր քանդակին և տապալել այն, ինչի հետևանքով արձանները վնասվել էին: Ասում են՝ վարորդն ալկոհոլի ազդեցության տակ է եղել, բայց ոչ այնքան հարվածի ուժգնությունն է եղել արձանների տապալման պատճառը, որքան ոչ ամուր պատվանդանը:
Վերականգնումից հետո արձանների տեսքը չի փոխվել, փոխված է միայն պատվանդանը. ավելի բարձր է: Այսօր տունդարձի ճանապարհին աշուղներն ասես ավելի տոնական, բայց միաժամանակ փոքր-ինչ մտախոհ տեսք ունեին՝ «տեսնես` այս անգամ պատվանդանն ավելի ամու՞ր է»:
«Պատվանդանն այս անգամ ավելի ամուր է»,-վստահեցնում է Գյումրու փոխքաղաքապետ Վաղարշակ Մխիթարյանը:
Ի դեպ, արձանախումբը վերականգնել է նույն վարպետը՝ Արտուշ Պապոյանն իր երեք որդիների հետ: Աշխատանքների իրականացման համար գումարի մի մասն է այս պահին փոխանցվել վարպետին՝ այն էլ ԱՊՊԱ-ի կողմից, իսկ մյուս մասի վճարման համար քաղաքապետարանը կդիմի դատարան՝ ՃՏՊ-ի պատճառ դարձած վարորդից գումարի մյուս հատվածը պահանջելու հայցով:
«Ընդհանուր առմամբ պատահարի հետևանքով արձանախմբին պատճառվել է 3 մլն 658 հազար դրամի նյութական վնաս, որից 1 մլն 800 հազար դրամը ապահովագրական ընկերությունը հատուցել է օրենքով սահմանված կարգով, իսկ գումարի տարբերության համար հայց ենք ներկայացնելու դատարան՝ մեղավորից գանձելու պահանջով»,-տեղեկացրեց Գյումրու փոխքաղաքապետ Վաղարշակ Մխիթարյանը` նշելով, որ սխալը եղել է պատվանդանի նախագծման ժամանակ՝ ոչ ճիշտ հաշվարկների պատճառով:
Վերականգնման աշխատանքը բավական աշխատատար ու շատ ավելի դժվար է, քան նոր արձանի ստեղծումը. պոկվել էին արձանների ձեռքերն ու ոտքերը, դեֆորմացվել` արձաններից մեկի գլուխն ու մարմնի մյուս հատվածները, խախտվել էր ընդհանուր ներքին կառուցվածքը:
Արտուշ Պապոյանը ևս վստահեցրեց, որ նմանատիպ խնդիր չէր լինի, եթե պատվանդանն ավելի ճիշտ նախագծված լիներ: Այսօր արդեն այն համապատասխանում է ստանդարտին, մնում է միայն, որ արձանները, ինչպես ասում են, «շառից-փորձանքից հեռու լինեն»:
