ԵՐԵՎԱՆ, 21 հունիսի-Sputnik. Հայաստանն ամեն կերպ աջակցում է կրթական հաստատություններում ռուսաց լեզվի ուսուցմանը, ասաց Հայաստանի Ազգային ժողովի պատգամավոր Հայկ Բաբուխանյանը «Ռուսաց լեզու. Եվրասիայի ավանդական ընտրությունը» թեմայով Մոսկվա-Քիշնև-Երևան տեսակամրջի ժամանակ։
«Հայաստանում ռուսաց լեզվին կարևոր դեր է հատկացվում։ Պետությունը մեծ նշանակություն է տալիս դրա ուսուցմանը, մասնավորապես` մանկապարտեզներում, դպրոցներում, համալսարաններում»,- ասաց Բաբուխանյանը։
Նա նշեց, որ երկրում գործում է Ռուս-հայկական համալսարան, Լոմոնոսովի համալսարանի մասնաճյուղ և մի շարք այլ ռուսական բուհեր։
Երկրում հրատարակվում են թերթեր ռուսերեն լեզվով, որոնք մասամբ ֆինանսավորվում են պետության կողմից, հեռուստատեսությամբ ցուցադրվում են ռուսերեն ֆիլմեր և հաղորդումներ։
Մեծ ուշադրություն է հատկացվում թատրոնին և մշակույթին։ Ստանիսլավսկու անվան ռուսական դրամատիկական թատրոնում բեմադրվում են հայ և ռուս հեղինակների ներկայացումներ ռուսերեն լեզվով։
Բաբուխանյանի խոսքով` պետությունը կարևոր տեղ է տալիս ռուսաց լեզվին, քանի որ կարծում է, որ դա անհրաժեշտ է ոչ միայն գիտական և կրթական տեսանկյունից, այլև Ռուսաստանի հետ բարեկամական հարաբերություններին աջակցության առումով։
Բաբուխանյանը կարծում է, որ Ռուսաստանը կարող է օգտագործել արևմտյան կառույցների փորձը, որոնք տարբեր երկրներում ակտիվորեն աջակցում են անգլերեն լեզվի զարգացմանը, այդ թվում` Հայաստանում։
Ռուս-հայկական (Սլավոնական) համալսարանի պրոռեկտոր Պարգև Ավետիսյանը նշեց, որ Հայաստանում գործում են ՌԴ պետական կրթական չափանիշներով շուրջ 10 դպրոց, կա 200 հայկական դպրոց` ռուսաց լեզվի խորացված դասավանդմամբ, և դա միայն Երևանում։
Երևանի պետական համալսարանը, ՌՀՀ-ն, Բրյուսովի անվան լեզվաբանական համալսարանը, Երևանի մանկավարժական համալսարանը ոչ միայն նպաստում են ռուսաց լեզվի տարածմանը, այլև հետազոտական աշխատանք են իրականացնում։
«Հայաստանում ռուսաց լեզվի հետ ամեն ինչ միշտ կարգին է եղել»,- ասաց Ավետիսյանը։
Նրա խոսքով` ՌՀՀ-ն հենց նման առաքելություն է կատարում` զբաղվելով ոչ միայն լեզվի տարածմամբ, այլև ակադեմիական մակարդակում դրա ուսումնասիրմամբ։
Համալսարանի բազայի հիման վրա պատրաստվել է ավելի քան 3,5 հազար ուսուցիչ ողջ Հայաստանից։
Ավետիսյանը նշեց, որ ռուսաց լեզուն կշարունակի մնալ Եվրասիայի քաղաքական և մշակութային բաղադրիչը, սակայն անհրաժեշտ է ակտիվացնել նրան աջակցությունը։
Նրա խոսքով` ԵՏՄ-ում պետք է ստեղծել մարմիններ, որոնք պատասխանատու են լեզվական քաղաքականության համար, պետք են հատուկ ծրագրեր, կոնկրետ քայլեր ռուսաց լեզվին աջակցելու համար։
«Միջազգային հումանիտար զարգացում» ՀԿ-ի նախագահ Արման Ղուկասյանը նշեց, որ ողջ պատմության ընթացքում ռուսաց լեզուն երեք կարևոր գործառույթ է կատարել։
«Այն կատարել է համախմբող, մոբիլիզացնող և գործառութային դեր։ Համախմբող դերը դրսևորվել է խորհրդային տարիներին, երբ գործել են անդրազգային գիտատեխնիկական ինստիտուտները։ Դրանց շնորհիվ էլ իրագործվել է նրա պոտենցիալը, որի ժառանգորդներն ենք մենք այսօր»,- ասաց Ղուկասյանը։
Մոբիլիզացնող դերը պետք է դրսևորվի ԵՏՄ-ում, որը հիանալի հնարավորություն կտա վերստեղծել այդ գիտատեխնիկական պոտենցիալը։
Ղուկասյանի խոսքով` Հայաստանում ռուսաց լեզվի տարածման կարևորագույն կենտրոններից մեկը Ռուս-հայկական համալսարանն է։ Նա նշեց, որ հայկական գրադարանների և գիտական կենտրոնների գրքային ֆոնդերը հիմնականում «ռուսալեզու» են։
Դա հերթական անգամ ընդգծում է Հայաստանի համար ռուսաց լեզվի կարևոր դերը։
