ԵՐԵՎԱՆ, 21 հունիսի — Sputnik. Հայաստանի և Ադրբեջանի նախագահների հանդիպումը լավ նշան է, լրագրողներին է ասել Հայաստանում Ֆրանսիայի արտակարգ և լիազոր դեսպան Ժան Ֆրանսուա Շարպանտիեն։
Հայաստանի, Ռուսաստանի և Ադրբեջանի նախագահներ Սերժ Սարգսյանի, Վլադիմիր Պուտինի և Իլհամ Ալիևի եռակողմ հանդիպումը կայացավ հունիսի 20-ին։ Հանդիպման արդյունքում կողմերը հանդես եկան համատեղ հայտարարությամբ, որում ասված էր, թե կողմերը փոխհամաձայնության են եկել մի շարք հարցերի շուրջ, որոնց լուծումը պայմաններ կստեղծի Լեռնային Ղարաբաղի հակամարտության կարգավորման գործընթացում առաջընթաց արձանագրելու համար։
«Փաստը, որ հանդիպում են, տեղի են ունենում շփումներ, երկխոսություն է լինում՝ ուղղված վստահության միջոցառումների հաստատմանը, ինքնին արդեն իսկ լավ նշան է»,- ասաց դեսպանը՝ նշելով, որ առանց երկխոսության չի կարող լինել քաղաքական լուծում, կողմերը միմյանց չեն կարող ճանաչել։
Շարպանտիեի խոսքով` վստահության մեխանիզմների ձևավորումն առանցքային և կարևոր հարց է։
Նշենք, որ ապրիլյան քառօրյա պատերազմի հետո սա նախագահների երկրորդ հանդիպումն էր։ Դեսպանը հիշեցրեց, որ առաջին հանդիպումը կայացել էր ԱՄՆ-ի նախաձեռնությամբ, իսկ երկրորդը` Ռուսաստանի։
