ԵՐԵՎԱՆ, 21 հունիսի — Sputnik. Ծանրամարտի միջազգային ֆեդերացիան հրապարակել է այն մարզիկների անունները, որոնք դոպինգի պատճառով ժամանակավորապես որակազրկվել են: Մարզիկների որակազրկումն ուժի մեջ է մինչև գործի քննության ավարտը: Որակազրկված մարզիկների թվում է նաև Եվրոպայի կրկնակի չեմպիոն և Լոնդոնի օլիմպիական խաղերի բրոնզե մեդալակիր Հռիփսիմե Խուրշուդյանը, ով չի կարող մասնակցել մրցաշարերի:
Խուրշուդյանը Հայաստանի հավաքականի կազմում պետք է մասնակցեր օգոստոսի 5-ին Բրազիլիայում մեկնարկող օլիմպիական խաղերին:
Sputnik Արմենիայի տեղեկությունների համաձայն` Հռիփսիմե Խուրշուդյանի դոպինգ նմուշը դրական արդյունք է տվել, ընդ որում` դա վերաբերում է 2008 թվականին Պեկինում անցկացված Օլիմպիական խաղերին։ Այդ մրցումներում Խուրշուդյանը զբաղեցրել է 11-րդ տեղը։
Խուրշուդյանի որակազրկումից հետո Հայաստանի կանանց ծանրամարտի հավաքականի կազմում փոփոխություն կլինի։ Ամենայն հավանականությամբ, Խուրշուդյանի փոխարեն Ռիոյի մրցահարթակ դուրս կգա Սոնա Պողոսյանը։
Վերջին երկու Օլիմպիական խաղերում դոպինգ նմուշների ստուգումը սկսվեց այն բանից հետո, երբ Ռուսաստանի բազմաթիվ մարզիկների մոտ դոպինգ հայտնաբերվեց ։
Հավանական որակազրկման ենթակա մարզիկների թվում նախապես նշվում էր նաև հայ ծանրորդ Տիգրան Մարտիրոսյանի անունը։ Սակայն առայժմ նրա հետ կապված որևէ պաշտոնական հայտարարություն չկա։
