ԵՐԵՎԱՆ, 21 հունիսի — Sputnik. ԵՄ-ն մտադիր է ևս կես տարով երկարաձգել ՌԴ-ի նկատմամբ սահմանած տնտեսական պատժամիջոցները, սակայն պատրաստ է հետագայում փոխել իր դիրքորոշումը, հայտարարել է Ֆրանսիայի արտգործնախարար Ժան-Մարկ Էյրոն։
«Այսօր պատժամիջոցները վերացնելու պահանջները չեն կատարվել, Մինսկի համաձայնագրերը չեն իրականացվում։ Կան որոշակի փոփոխություններ, սակայն դրանք բավարար չեն։ Քանի որ այս պատժամիջոցների նպատակահարմարությունը որոշվելու է երկրի ղեկավարների և կառավարության մակադրակով, ես կուզեի, որ ԵԽ-ի հաջորդ նիստում մենք չբավարարվենք պատժամիջոցների երկարաձգմամբ, այլ քննարկումներ լինեն, Ֆրանսիայի նախագահը (Ֆրանսուա Օլանդը) և ԳԴՀ-ի կանցլերը (Անգելա Մերկելը) տեղեկացնեն, թե ինչ է արել «նորմանդական» ձևաչափը Մինսկի համաձայնագրերի իրականացման հարցում առաջընթաց գրանցելու համար», — ասել է լրագրողներին Էյրոն։
«Քանի որ այս պատժամիջոցները կերկարացվեն վեց ամսով, պետք է քննարկել հասկանալու համար` եթե կոնկրետ առաջխաղացում լինի, կարելի է ընդառաջ գնալ։ Սակայն դրա համար անհրաժեշտ է կատարել պայմանները, ռուսաստանցիներն ու ուկրաինացիները պետք է աշխատանքի իրենց մասը կատարեն», — ավելացրել է նա։
Նրա խոսքով` ցանկալի է, որ քննարկումն անցկացվի առաջիկա գագաթնաժողովի ժամանակ, որը նախատեսված է հունիսի 28-ին և 29-ին։
«Ցանկալի կլիներ, որ ԵԽ-ի այս նիստից սկսած` քննարկվեին «նորմանդական» ձևաչափում իրականացված աշխատանքների արդյունքները, Մինսկի համաձայնագրերի իրականացումը, պատժամիջոցների երկարաձգումը, ինչպես նաև հետագա քայլերը` առաջընթացի դեպքում», — ասել է Ֆրանսիայի արտգործնախարարը։
Ռուսաստանի նկատմամբ ԵՄ-ի գործող պատժամիջոցների գործողության ժամկետը լրանում է հուլիսի վերջին, սակայն դրանց հետագա ճակատագիրը դեռ պետք է քննարկվի ԵՄ-ի գագաթնաժողովում։ ԵՄ դիվանագիտության ղեկավար Ֆեդերիկա Մոգերինին հայտնել է, որ պատժամիջոցները կարող են երկարացվել, սակայն նշել է, որ ԵՄ-ն չի քննարկում դրանց խստացումը։
