ԵՐԵՎԱՆ, 20 հունիսի — Sputnik. Ռուսաստանի, Ադրբեջանի և Հայաստանի նախագահները Լեռնային Ղարաբաղի վերաբերյալ եռակողմ հայտարարություն են համաձայնեցրել։ Երեք երկրների առաջնորդների բանակցություններից հետո այս մասին հայտնել է ՌԴ արտգործնախարար Սերգեյ Լավրովը ։
«Պուտինը, Ալիևն ու Սարգսյանը համաձայնեցրել են եռակողմ հայտարարությունը, որում նշվում է, որ քաղաքական կարգավորման հարցում կայուն առաջընթացի կողմնակից են», — ասել է Լավրովը։ Նրա խոսքով` վերջին օրերին Լեռնային Ղարաբաղում պահպանվում է հրադադարի ռեժիմը։
«Երկրի ղեկավարների հանդիպումը կայացել է առանց ուղեկցողների և օգնականների», — նշել է նա։
Լավրովը հայտնել է, որ նախագահները համաձայնել են ավելացնել ԵԱՀԿ դիտորդների թիվը։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
