ԵՐԵՎԱՆ, 20 հունիսի — Sputnik. Հունիսի 20-ին հայկական ակումբներն իմացան, թե ում հետ են մրցելու ՈւԵՖԱ-ի Չեմպիոնների լիգայում և Եվրոպայի լիգայի խաղարկությունում:
Հայաստանի չեմպիոն «Ալաշկերտը» Չեմպիոնների լիգայի որակավորման առաջին փուլում իր հանդիպումներն է անցկացնելու Անդորրան ներկայացնող «Սանտա Կոլոմնա» թիմի հետ: Առաջին հանդիպումը կայանալու է հունիսի 28-29-ին մրցակցի հարկի տակ, իսկ պատասխան խաղում «Ալաշկերտը» հյուրընկալելու է Անդորրայի թիմին հուլիսի 5-6-ին:
Անկասկած, այս զույգի ֆավորիտը մեր չեմպիոնն է: Սակայն «Ալաշկերտը» չպետք է թերագնահատի անդորրացիներին` հիշելով այս թիմի մրցակցությունը «Բանանցի» հետ: Չեմպիոնների լիգայի 2014/15 թվականների խաղարկությունում Հայաստանի չեմպիոն հանդիսացող «Բանանցը» երկու հանդիպումների արդյունքում զիջեց ճանապարհը «Սանտա Կոլոմնային»:
Նշենք, որ «Սանտա Կոլոմնա» — «Ալաշկերտ» զույգի հաղթողը հաջորդ փուլում մրցելու է Թբիլիսիի «Դինամոյի» հետ:
Եվրոպայի լիգայի խաղարկությունում Հայաստանը ներկայացնելու է երեք թիմ՝ «Շիրակը», «Փյունիկը» և «Բանանցը»:
Գյումրիի «Շիրակը» որակավորման առաջին փուլի հանդիպումն անցկացնելու է մրցակցի հարկի տակ՝ Վրաստանում: Մեր թիմի մրցակիցն է լինելու Գորիի «Դիլան»:
«Փյունիկի» մրցակիցն է լինելու Ջիբրալթարը ներկայացնող «Եվրոպա» թիմը, իսկ «Բանանցը» մրցելու է Կիպրոսի «Օմոնիայի» հետ: Հայկական թիմերն առաջին խաղն անցկացնելու են սեփական հարկի տակ: Եվրոպայի լիգայում հանդես եկող հայկական երեք ակումբներից համեմատաբար ամենաթույլ մրցակիցը բաժին է հասել «Փյունիկին»:
Առաջին հանդիպումները կայանալու են հունիսի 30-ին, պատասխան խաղերը հուլիսի 7-ին:
