ԵՐԵՎԱՆ, 20 հունիսի — Sputnik. Ռուսաստանի նախագահ Վլադիմիր Պուտինը նախ առանձին-առանձին հանդիպումներ է ունեցել Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հետ, իսկ այժմ երեք առաջնորդները միասին են նստել բանակցային սեղանի շուրջ։
Հանդիպումն անցնում է ռուսական կողմի նախաձեռնությամբ։ Սանկտ Պետերբուրգում են նաև ԵԱՀԿ Մինսկի խմբի համանախագահները: Ամերիկացի միջնորդ Ջեյմս Ուորլիքը ժամեր առաջ Թվիթերում հույս է հայտնել, թե այսօրվա հանդիպումները կարագացնեն վստահության ամրապնդմանն ուղղված քայլերը և պայմաններ կստեղծեն հակամարտության կարգավորման շրջանակային փաստաթղթի համար:
Սարգսյանը Պուտինի հետ հանդիպման ժամանակ ասել է. «Ղարաբաղի վերաբերյալ մեր դիրքորոշումը հայտնի է բոլորին։ Մենք ցանկանում ենք, որ այդ հարցը լուծվի բացառապես խաղաղ ճանապարհով։ Եվ ցանկանում եմ շնորհակալություն հայտնել ձեզ` որպես ԵԱՀԿ ՄԽ համանախագահող երկրի, այս հարցում ներդրած ջանքերի և փոխըմբռնման համար»
Ալիևն իր հերթին շնորհակալություն է հայտնել Պուտինին եռակողմ հանդիպում անցկացնելու համար և հույս հայտնել, որ բանակցային գործընթացը «կառուցողական դինամիկա» կստանա։
Սանկտ Պետերբուրգ մեկնելուց առաջ Ադրբեջանի նախագահը ելույթ էր ունեցել և պնդել, թե Բաքուն անբովանդակ բանակցություններ անցկացնելու մտադրություն չունի:
Պաշտոնական Երևանն էլ իր հերթին հանդիպումից առաջ քննադատել է Բաքվին՝ պնդելով, թե Նախիջևանում երեկ զորավարժություններ սկսելուց առաջ Ադրբեջանը պատշաճ ծանուցում չի ուղարկել միջազգային գործընկերներին:
