ԵՐԵՎԱՆ, 20 հունիսի — Sputnik. Ռուսաստանի նախագահ Վլադիմիր Պուտինը Հայաստանի նախագահ Սերժ Սարգսյանի հետ հանդիպման ժամանակ նշել է, որ Ռուսաստանի շուկայում աճել է հայկական գյուղմթերքի մատակարարման ծավալը։ Նա գոհունակությամբ է խոսել երկու երկրի հարաբերությունների ինտենսիվ զարգացման մասին։
«Կարելի է նշել, որ ինտեգրացիոն գործընթացների շրջանակում մեր հարաբերություններն ավելի ինտենսիվորեն են զարգանում, քան նախկինում, ինչը շատ ուրախալի է։ Պետք է խոսել այն մասին, թե ինչպես ենք հետագայում գործելու։ Այսօր Հայաստանը նախագահում է ՀԱՊԿ-ում, և աշնանը պետք է բարձրագույն մակարդակով հանդիպում կայանա», — ասել է Պուտինը։
Սարգսյանն իր հերթին ընդգծել է, որ նման հանդիպում կարող է լինել հոկտեմբերին։
«Այնպես որ այդ հարցի շուրջ նույնպես կզրուցենք», — ընդգծել է Պուտինը` Սարգսյանին շնորհակալություն հայտնելով Ռուսաստան այցելելու համար։
Նա նաև նշել է, որ երկու երկրի միջև ավելացել է ապրանքաշրջանառության ծավալը։ Նրա խոսքով` դրական ցուցանիշներ են արձանագրվել գյուղմթերքի մատակարարման ոլորտում։
«Չնայած համաշխարհային և մեր տնտեսության մեջ առկա բոլոր դժվարություններին` մենք ապրանքաշրջանառության աճ ենք արձանագրում։ Կարելի է ասել` ռուսական շուկայում մի քանի անգամ է աճել հայկական գյուղմթերքի մատակարարումը, ինչը մեզ շատ է ուրախացնում։ Հուսով եմ, որ նման միտում կգրանցվի նաև մեզ համար խոցելի ապրանքախմբերի դեպքում», — ասել է Պուտինը։
Ռուսաստանի և Հայաստանի միջև ապրանքաշրջանառության ծավալն այս պահին գերազանցում է 1 մլրդ 250 մլն դոլարը։
