ԵՐԵՎԱՆ, 20 հունիսի — Sputnik. Հայաստանի նախագահ Սերժ Սարգսյանը կարծում է, որ հետաքննության մեխանիզմների ստեղծումը լավ նախադրյալներ կստեղծի Լեռնային Ղարաբաղի հակամարտության շուրջ բանակցություններ անցկացնելու համար։
«Ղարաբաղի վերաբերյալ մեր դիրքորոշումը հայտնի է բոլորին։ Մենք ցանկանում ենք, որ այդ հարցը լուծվի բացառապես խաղաղ ճանապարհով։ Եվ ցանկանում եմ շնորհակալություն հայտնել ձեզ` որպես ԵԱՀԿ ՄԽ համանախագահող երկրի, այս հարցում ներդրած ջանքերի և փոխըմբռնման համար», — Սանկտ Պետերբուրգում Վլադիմիր Պուտինի հետ հանդիպման ժամանակ ասել է Սարգսյանը։
«Սակայն, ցավոք, նման հակամարտությունները չեն լուծվում միայն մի կողմի ցանկությամբ։ Եվ մենք ուրախ կլինեինք, եթե այսօր կարողանայինք մեր պայմանավորվածությունների առաջընթաց արձանագրել, այսինքն` հետաքննության մեխանիզմներ ստեղծել։ Եվ դա բանակցությունների համար աշխատանքային տրամադրվածություն կստեղծի», — ավելացրել է ՀՀ նախագահը։
Պուտինն իր հերթին նշել է, որ պատրաստ է քննարկել բոլոր այս հարցերը։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
