ԵՐԵՎԱՆ, 20 հունիսի-Sputnik. Սանկտ Պետերբուրգում Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը կօգնի ամրապնդել հակամարտության կողմերի միջև վստահությունը, Twitter-ի իր միկրոբլոգում գրել է ԱՄՆ-ից ԵԱՀԿ Մինսկի խմբի համանախագահ Ջեյմս Ուորլիքը։
Հայաստանի և Ադրբեջանի նախագահները կհանդիպեն հունիսի 20-ին Սանկտ Պետերբուրգում` Ռուսաստանի նախագահ Վլադիմիր Պուտինի միջնորդությամբ։
«Սարգսյանի և Ալիևի միջև այսօրվա հանդիպումը վստահություն է ներշնչում կողմերի միջև ու պայմաններ ստեղծում ղարաբաղյան հակամարտության վերաբերյալ շրջանակային համաձայնագրի ուղղությամբ աշխատանքի համար»,- գրել է Ուորլիքը։
Today's mtgs w #Sargsyan and #Aliyev build trust, accelerate confidence-building, and create conditions for a framework document on #NKpeace
— James Warlick (@AmbJamesWarlick) 20 июня 2016 г.
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
