ԵՐԵՎԱՆ, 18 հունիսի — Sputnik. Դորտմունդի «Բորուսիայի» ղեկավարությունը վերջնական որոշում է կայացրել` չվաճառել թիմի կիսապաշտպան Հենրիխ Մխիթարյանի տրանսֆերը, այ մասին ասել է գերմանական ակումբի գլխավոր տնօրեն Հանս Յոահիմ Վատցկեն, գրում է armsport--ը:
«Մենք ակումբում մանրամասն քննարկեցինք Մխիթարյանին վաղաժամ հրաժեշտ տալու հարցը և որոշեցինք, որ նա հաջորդ մրցաշրջանում պետք է մնա «Բորուսիայում»»,- Վատցկեի խոսքերն է մեջբերում «Բիլդ» պարբերականը:
Ավելի վաղ տեղեկություն էր տարածվել այն մասին, որ Հայաստանի հավաքականի ավագը ցանկանում է տեղափոխվել «Մանչեսթեր Յունայթեդ»: Անգլիական գրանդը 27-ամյա ֆուտբոլիստին առաջարկում է տարեկան 10 միլիոն եվրո աշխատավարձ:
Հիշեցնենք, որ Մխիթարյանի պայմանագրի ժամկետը «Բորուսիայի» հետ սպառվում է 2017 թվականի ամռանը:
