ԵՐԵՎԱՆ, 18 հունիսի — Sputnik. Գևորգյան հոգևոր ճեմարանի և Ս. Վլադիմիր Ուղղափառ ճեմարանի (ԱՄՆ) միջև գործակցության համաձայնագիր ստորագրվեց, հայտնում են Մայր Աթոռ Սուրբ Էջմիածնի տեղեկատվական համակարգից:
Համաձայնագիրը ստորագրվեց հունիսի 17-ին` օրհնությամբ Ամենայն Հայոց Գարեգին Բ Կաթողիկոսի։
Գևորգյան հոգևոր ճեմարանի տեսուչ Տ. Գարեգին վարդապետ Համբարձումյանը նշեց, որ դեռևս անցյալ դարակեսին Հայ Եկեղեցու հոգևորականները շփումներ են ունեցել Նյու Յորքի Ս. Վլադիմիր հոգևոր ճեմարանի հետ, որը օրթոդոքս աշխարհից դուրս օրթոդոքս ավանդության ամենից կարևոր կրթական բարձրագույն հաստատություններից մեկն է:
«Անցյալ դարակեսին Ս. Վլադիմիրի ճեմարանն աստվածաբանների այնպիսի փաղանգ է տեսել, ինչպիսիք էին Գեորգի Ֆլորովսկին, Նիկոլայ Լոսկին, Ալեքսանդեր Շմեմանը, Զոն Մայենդորֆը և ուրիշներ, ովքեր Օրթոդոքս աստվածաբանությունը մի նոր բարձունքի հասցրեցին և դարձան ավանդական և մերօրյա աստվածաբանական մոտեցումների կամրջողները»,- նշեց նա:
Նրա խոսքով` Գևորգյան հոգևոր ճեմարանի և Ս. Վլադիմիրի միջև համաձայնագրի ստորագրմամբ «մենք հույս ունենք, որ պիտի առավել սերտանան նաև մեր Եկեղեցիների միջև կապերը կրթության ոլորտում»։
Ս. Վլադիմիր Ուղղափառ ճեմարանի (ԱՄՆ) տեսուչ, Արժանապատիվ դոկտոր Ջոն քահանա Բեռն ընդգծեց, որ իրեն շատ լավ է զգում առաջին քրիստոնյա երկրում, քանի որ մոտիկից հնարավորություն է ընձեռվել ծանոթանալու քրիստոնեական արժեքներին:
Մայր Աթոռի հոգևոր-կրթական հաստատությունների վերատեսուչ Գերաշնորհ Տ. Գևորգ եպիսկոպոս Սարոյանն էլ նշեց, որ այս համաձայնագրի ստորագրումը բխում է միջազգային կապերի ոլորտում Գևորգյան ճեմարանի որդեգրած քաղաքականությունից. այն տրամաբանական շարունակությունն է նախորդ զարգացումների:
Նա վստահություն հայտնեց, որ ապագայում կլինի արդյունք, որը կհարստացնի հոգևոր կրթության ոլորտում փորձառությունը և կնպաստի երկու Եկեղեցիների միջև հարաբերությունների խորացմանը։
