ԵՐԵՎԱՆ, 18 հունիսի- Sputnik. Հայաստանի Հանրապետության Կենտրոնական Բանկը և Հարվարդի համալսարանի Ռուսական և Եվրասիական ուսումնասիրությունների Դևիս կենտրոնը հուլիսի 15-ին կնքել են Փոխըմբռնման հուշագիր, հայտնում են ՀՀ Կենտրոնական բանկից:
Հուշագիրը ստորագրել են ՀՀ ԿԲ նախագահի տեղակալ Ներսես Երիցյանը և Դևիս կենտրոնի գործադիր տնօրեն Ալեքսանդրա Վաքրուն:
Հուշագրի համաձայն` ՀՀ ԿԲ-ի Դիլիջանի ուսումնահետազոտական կենտրոնը յուրաքանչյուր տարի կհյուրընկալի Հարվարդի համալսարանի 3-4 ուսանողի, որոնք իրենց պրակտիկայի շրջանակում կիրականացնեն Հայաստանի ու տարածաշրջանի վերաբերյալ հերազոտություններ:
Հարվարդի համալսարանի և Կենտրոնական բանկի այս գործակցությունը սկսվել է 3 տարի առաջ, և այժմ հուշագրով այն ամրապնդվում ու երկարաժամկետ համագործակցության է վերածվում:
Նույն հուշագրով Հարվարդի համալսարանը տարեկան կհյուրընկալի ՀՀ ԿԲ-ի 2 աշխատակցի՝ ֆինանսների, մակրոտնտեսագիտության, հանրային կառավարման բնագավառներում ակադեմիական հետազոտություններ իրականացնելու նպատակով:
ԿԲ-ից հայտնում են, որ այս հուշագիրը ՀՀ ԿԲ-ի և Հարվարդի համալսարանի գործակցության կարևորագույն ձեռքբերումն է: Այն հետազոտություններ իրականացնելու յուրօրինակ հնարավորություն կընձեռի ինչպես ԿԲ-ի աշխատակիցներին, այնպես էլ Հարվարդի համալսարանի ուսանողներին և էապես կնպաստի գիտելիքների ձեռք բերմանը, հետազոտական կարողությունների զարգացմանը և դրանց միջազգային փոխանակմանը: Հուշագիրը գիտելիքների կրկնապատկման և փոխանակման հարցում միջազգային պատրաստակամության լավագույն նմուշ է:
