Հայաստանում ՌԴ Անվտանգության դաշնային ծառայության սահմանապահ վարչության ծառայողները բերման են ենթարկել Անգոլայի քաղաքացու, ով ապօրինի հատել է հայ-թուրքական սահմանը, տեղեկացնում է վարչության լրատվական ծառայությունը:
Հունիսի 15-ին իրավախախտը փորձել է հատել Արաքս գետն ու խորանալ ՀՀ տարածքում: Նրան հայտնաբերել են տեղի բնակիչներն ու հայտնել սահմանապահներին:
Հարցաքննության ընթացքում բերման ենթարկվածը նշել է, որ 1982թ.-ին ծնված Անգոլայի քաղաքացի է ու ցանկանում է Հայաստանով հասնել հայրենի Անգոլա: Նրա մոտ հայտնաբերվել է ուսապարկ, որում թաց հագուստ, հեռախոս ու փախստականի փաստաթուղթ է եղել:
