ԵՐԵՎԱՆ, 17 հունիսի — Sputnik. Նախարար Հասմիկ Պողոսյանը մտել է հոգեհանգստի արարողության սրահ, որտեղ տեսել է մի խումբ երեխաների։ Անմիջապես որոշում է կայացվել, որ երեխաներին պետք է դուրս տանել այնտեղից։
Հասմիկ Պողոսյանը հայտնեց, որ հոգեհանգստի արարողությունը կազմակերպելու համար որոշումներ կայացնում է կառավարական հանձնաժողովը։ Այն սովորաբար գլխավորում է ՀՀ վարչապետը։ Քանի որ վարչապետը քաղաքից բացակայում էր, նրա հանձնարարությամբ ու տեսակետներով նիստը կայացել է Պողոսյանի գլխավորությամբ։
«Մանրակրկիտ քննարկվել է ամբողջ արարողությունը, ամեն դրվագը, որ վերջին հրաժեշտի խոսքը ճիշտ ասենք։ Այդ սցենարի մեջ նման դրվագ նախատեսված չէր»,-ասաց Հասմիկ Պողոսյանը` նկատի ունենալով երեխաների մասնակցությունը։
Նրա խոսքով` անձնական նախաձեռնություններ կարող են լինել, բայց դրանք չեն կարող հակասել ընդհանուր հանձնաժողովի քննարկած արդյունքներին։
«Մենք պետք է շատ զգույշ լինենք մեր երեխաների հետ։ Ով դա կազմակերպել է, չի ցանկացել, որ որևէ վատ բան անի։ Ակնհայտ է, որ հարգանքի տուրք մատուցելու համար է եղել։ Բայց ձևաչափը ճիշտ ընտրված չէր»,-ասաց նախարարը։
Հասմիկ Պողոսյանն ընդգծեց, որ ահազանգի հետքերով արձագանքել են պատկան մարմինները։ Միաժամանակ նա հայտնեց, որ չէր ցանկանա` Օֆելյա Համբարձումյանի հրաժեշտի արարողությունը մոռանայինք ու խոսեինք այդ դրվագի մասին։ Նախարար Պողոսյանը վստահ է, որ նա, ով պետք է դասեր քաղեր, հասկացավ։
Նախատեսված է եղել, որ նշյալ երեխաները պետք է նաև երգեին։ Հասմիկ Պողոսյանը կանխել է այդ նախաձեռնությունը։
Տեղեկացնենք, որ երեխաները «Ջիվանու» աշուղական դպրոցի սաներն են։ Նրանց հոգեհանգստի արարողությանը մասնակցելու էր բերել Թովմաս Պողոսյանը։ Նա խոստովանել է, որ դա իր նախաձեռնությունն է եղել, քանի որ իր «դպրոցի սաներն ու նրանց ծնողները ճանաչել են երգչուհուն»։
Այս միջադեպից հետո խստորեն արձագանքել է Մարդու իրավունքների պաշտպանի գրասենյակը։ Իսկ ՀՀ կրթության և գիտության նախարարությունը սպասում է Թովմաս Պողոսյանի գրավոր արձագանքին։
