ԵՐԵՎԱՆ, 16 հունիսի-Sputnik. Քաղաքացիական դատավարության նոր օրենսգրքի ընդունումն Արփինե Հովհաննիսյանը պայմանավորեց մի քանի հանգամանքով։ Նրա բնորոշմամբ` գործող քաղաքացիական օրենսգիրքը զերծ չէ մի շարք թերություններից։
«Դատական ծախսերի և դատական ծանուցումների ընթացակարգերն ապացուցել են իրենց անարդյունավետությունը։ Այդ փոփոխությունների մի ստվար հատվածը, անկասկած, ողջամիտ և առաջադիմական բնույթի էր, սակայն միևնույն ժամանակ՝ չեմ կարող չնշել, որ, այդուհանդերձ, այդ փոփոխությունների մեծ մասը կատարվել էր առանց հայեցակարգային մշակման»,-ասաց նախարարը։
Հովհաննիսյանը կարևորեց նախնական դատական նիստի նշանակության բարձրացումը։ Նրա խոսքով` նախնական դատական նիստի ընթացքում հիմնական խնդիրը պետք է լինի ապացուցման բեռի բաշխումը և ապացույցների հավաքագրումը։
«Դատական նիստերի հետաձգման հիմքերը սպառիչ սահմանվել են Քաղաքացիական դատավարության օրենսգրքով, իսկ սա նշանակում է՝ այն բազմաթիվ դժգոհությունները, որոնք առկա էին դատական նիստերի անհարկի հետաձգման և ձգձգման հետ կապված, կվերանան, որովհետև պարզ կլինի՝ երբ, ինչու և ինչի համար է հետաձգվում դատական նիստը»,-ասաց նախարարը։
Նա ավելացրեց, որ դատավարական ժամկետների առումով պահպանվել է ընդհանուր կանոնը` ողջամիտ ժամկետում կատարել դատաքննությունը։ Միևնույն ժամանակ առանձին վարույթների համար սահմանվել են հստակ ժամկետներ։
Հովհաննիսյանի խոսքով` կանոնակարգվել է փաստաբանի խելամիտ վարձատրության ինստիտուտը։ Բացի այդ` կատարելագործվել է դատական ծանուցումների ինստիտուտը։ Նախարարը տեղեկացրեց նաև, որ նախատեսվել են երկու նոր վարույթներ՝ պարզեցված վարույթ և հեռակա դատաքննություն։
«Պարզեցված վարույթը թույլ կտա էականորեն նվազեցնել դատարանի ծանրաբեռնվածությունը, հեշտությամբ գործեր քննել։ Եթե ներկայացվել է նվազագույն աշխատավարձի 2000-ապատիկը չգերազանցող գումարի բռնագանձման պահանջ, ապա կարող է իրականացվել պարզեցված վարույթ»,-ասաց նախարարը։
Կառավարությունը հաստատեց ՀՀ Քաղաքացիական դատավարության նոր օրենսգրքի նախագիծը:
