Կազմակերպիչները, երաժիշտները, արվեստաբանները (շուրջ 40 մարդ) հավաքվել էին Մատենադարանում` համաշխարհային ֆեդերացիայի 60-րդ հոբելյանական վեհաժողովի կապակցությամբ։ Հայաստանն այդ մեծ միջազգային ընտանիքի անդամ է դարձել Արամ Խաչատրյանի անվան մրցույթի շնորհիվ, որն ամեն տարի մեկնարկում է մաեստրոյի ծննդյան օրը` հունիսի 6-ին։
«Հայաստանը դասական երաժշտության կատարման բարձր որակ է ցույց տվել, չէ՞ որ այդ կազմակերպության անդամ դառնալու համար պետք է մի շարք պահանջների համապատասխանես։ Մենք ուրախ ենք, որ կարողացել ենք հաղթահարել այդ սահմանագիծը»,- լրագրողների հետ զրույցում ասաց Հայաստանի մշակույթի նախարար Հասմիկ Պողոսյանը։
Նրա խոսքով` այդ մրցույթի օգնությամբ աշխարհը ոչ միայն հայկական երաժշտությանն է ծանոթանում, այլև` մեր երկրին։
«Վեհաժողովը թույլ կտա ճանաչել մեր երկիրը, ինչն անչափ կարևոր է, քանի որ այս տարածաշրջանը շատերի մոտ ասոցացվում է խնդրների, պատերազմի հետ, և մարդիկ հաճախ չեն գիտակցում ինչպիսի պաշարներ, ինչ հարուստ մշակույթ ունի մեր երկիրը»,- ասաց Պողոսյանը։
Միջազգային մրցույթների ֆեդերացիայի համաշխարհային վեհաժողովն առանցքային իրադարձություն է երաժշտական աշխարհում։ Հայաստանում են հավաքվել աշխարհի լավագույն մրցույթների («Արթուր Ռուբենշտեյնի», «Լիստի», «Շոպենի» և այլ մրցույթներ) ներկայացուցիչները:
Վեհաժողովի շրջանակում մասնակիցները կխոսեն մի շարք կարևոր հարցեր շուրջ, որոնցից մեկն էլ կվերաբերի ֆեդերացիայի ցուցակում մի քանի մրցույթներ ներառելու հայտերի քննարկմանը։
