ԵՐԵՎԱՆ, 14 հունիսի — Sputnik. Մի շարք պատգամավորներ, չնայած ԱԺ-ի հերթական նիստում բուռն քննարկումներին, ակտիվորեն հետևում են ֆուտբոլի Եվրոպայի առաջնությանը։
Առավել ուշադիր ֆուտբոլային երկրպագուներից է ԱԺ փոխխոսնակ Էդուարդ Շարմազանովը։
«Ֆուտբոլային տոնը, որը ողջ Եվրոպայում է և ոչ միայն, մի ամբողջ ամիս է տևելու։ Անգլիան արագ ֆուտբոլ խաղաց, Ֆրանսիան նույնպես լավ էր դիտվում։ Ինձ հաճելիորեն զարմացրին երկու թիմեր` Խորվաթիան, որը ֆանտաստիկ ֆուտբոլ ներկայացրեց, և անկախ պարտությունից` Ուկրաինան», — ասաց Շարմազանովը։
Շարմազանովը սիրած թիմ չունի, նա խոստովանում է, որ մանկուց երկրպագել է «Արարատին», այնուհետև Մարադոնայի թիմին, իսկ հետո եղել է Ռոբերտո Բաջոյի երկրպագուն։
«Իսկ հիմա գեղեցիկ ֆուտբոլի երկրպագու եմ։ Ինչ վերաբերում է ֆավորիտներին, ապա առաջին փուլից հետո նրանց մասին խոսում են նրանք, ովքեր ոչինչ չեն հասկանում ֆուտբոլից։ Դա անկանխատեսելի է, առավել ևս, որ թիմերի մակարդակը հավասարվել է, այդ իսկ պատճառով խոշոր հաշիվ դեռ չի արձանագրվել», — ասաց Շարմազանովը։
Նա նշում է, որ բացի Խորվաթիայից, Անգլիայից, Ֆրանսիայից և Ուկրաինայից, լավ էր դիտվում նաև Գերմանիան, որը հրաժարվել էր ուժային ֆուտբոլից և կարճ փոխանցումների տեխնիկա է ցուցադրում։ Նրա խոսքով` այն խաղում էր իսպանապորտուգալական ոճով։
Բելգիացիների պարտությունից հետո Շարմազանովը նշեց նաև իտալացիների գեղեցիկ խաղը։
Ինչպես պարզվեց, ֆուտբոլ սիրում է նաև «Հայ ազգային կոնգրեսի» խմբակցության քարտուղար Արամ Մանուկյանը։
«Ես ֆուտբոլը գնահատում եմ որպես արվեստ։ Մեծ հաճույքով դիտում եմ բոլոր խաղերը, որոնք կարողանում եմ։ Ես չունեմ թիմեր, որոնց երկրպագում եմ կամ սիրում։ Ես երկրպագում եմ այն թիմին, որը գեղեցիկ խաղ է ցուցադրում», — ասաց նա։
Նրա խոսքով` ներկա պահին իրեն Ֆրանսիայի խաղն է դուր եկել, թեև չի կարծում, որ այն կհաղթի։
«Բարգավաճ Հայաստան» կուսակցության պատգամավոր Վահե Էնֆիանջյանը գնահատում է ոչ միայն ֆուտբոլը, այլև սպորտն ընդհանրապես։
«Ես ֆուտբոլի սիրահար եմ, սակայն մեծ երկրպագու ինձ չեմ համարում», — ժպտալով ասաց Էնֆիաջյանը։
Նա հայտնեց, որ կուսակցության ներսում ֆուտբոլի առաջնություն է անցկացվում։ 16 թիմ է մասնակցում Երևանում այդ առաջնությանը, սակայն նրանք մտադիր են ընդլայնել այդ առաջնությունը և անցկացնել ամբողջ Հայաստանում։
Նրա խոսքով` ի սկզբանե ֆավորիտ են համարվել Ֆրանսիան և Բելգիան, սակայն ինքը կարծում է, որ առաջնության տերերն ավելի մեծ շանսեր ունեն։ Նա չի առանձնացնում սիրված որևէ թիմ, սակայն Ֆրանսիայի խաղը նրան դուր է եկել։
