ԵՐԵՎԱՆ, 13 հունիսի — Sputnik. ԱԺ-ն մեկ րոպե լռությամբ հարգանքի տուրք մատուցեց հունիսի 13-ին կյանքին հրաժեշտ տված ՀՀ ժողովրդական արտիստ Օֆելյա Համբարձումյանի հիշատակին։
Խորհրդարանի փոխխոսնակ Էդուարդ Շարմազանովը ընդհատեց խորհրդարանի հերթական նիստը` հայտարարելով, որ մահացել է հայտնի երգչուհի Օֆելյա Համբարձումյանը։
«Մահացել է 20-րդ դարի մեծագույն երգչուհիներից մեկը, մեր ժողովրդի հպարտություններից մեկը, Հայաստանի ժողովրդական արտիստ Օֆելյա Համբարձումյանը», — ասաց Շարմազանովը։
Պատգամավորների անունից նա ցավակցություն է հայտնեց Համբարձումյանի հարազատներին և ամբողջ հայ ժողովրդին։ Փոխխոսնակի խոսքով`մեծ երգչուհին իր արվեստով ապացուցեց, որ հայկական մշակույթը անզուգական է և սքանչելի։
