ԵՐԵՎԱՆ, 13 հունիսի — Sputnik. Օրեր առաջ ՄԱԿ-ի գլխավոր վեհաժողովի ՄԻԱՎ-ՁԻԱՀ խնդիրներին նվիրված հանդիպման ընթացքում Հայաստանը, Բելառուսը, Մոլդովան և Թաիլանդը ճանաչվեցին մորից երեխային ՄԻԱՎ-ի փոխանցումը հաղթահարած երկրներ։ ՄԱԿ-ի գլխավոր քարտուղար Պան Գի Մունն անձամբ նշեց, որ Հայաստանն օրինակելի երկիր է այս հարցում։
ԱԺ առողջապահության, մայրության և մանկության հարցերի հանձնաժողովի նախագահ Արա Բաբլոյանը հատուկ ընդգծեց, որ առողջ երեխա ունենալու համար նախ պետք է ունենալ առողջ դեռահաս։
«Հենց դեռահասության ժամանակ կարող ենք սերմանել այն մոտեցումները, որոնք թույլ կտան դառնալ առողջ մայր և ունենալ առողջ երեխա։ Դեռահասության շրջանն ամենախոցելին է։ Հենց այդ հատվածում են շատերը տարվում ծխախոտով, ալկոհոլով, ապրում սեռական անառողջ կյանքով»,-ասաց նա։
Առհասարակ պերինատալոգիան մանկաբարձության խոշոր բաժիններից է, որն ուսումնասիրում է պտղի զարգացումը, ապահովում մոր, պտղի ու նորածնի առողջության պահպանումը։
Հայաստանի գլխավոր գինեկոլոգ Ռազմիկ Աբրահամյանն էլ ուրախալի մի օրինակ բերեց, թե ինչպես է երիկամային փոխպատվաստում անցած կինը ծննդաբերել հայ արհեստավարժ բժիշկների շնորհիվ։ Այս օրինակը նա համարում է հայկական բժշկության առաջընթացն ու լուրջ ձեռքբերումը։
«Իմ նշած կնոջ մոտ 5 տարի առաջ երիկամային փոխպատվաստում է կատարվել։ Ընդ որում, այդ կնոջ 2 երիկամները հեռացվել էին, մի երիկամն էլ մայրն էր նրան տրամադրել։ Շատերն այդ կնոջը հորդորում էին երկար տարիներ չհղիանալ, բայց նա հղիացավ։ Պահեցինք մինչև 36 շաբաթական, հետո պտղաջրերը գնացին, կատարեցինք կեսարյան հատում»,- ասաց Ռազմիկ Աբրահամյանը։
Հայաստանը պերինատալոգիայի ոլորտում զգալի հաջողություններ ունի։ Խոսքը վերաբերում է հատկապես մայրական ու մանկական մահացության ցուցանիշների տեսանելի նվազմանը։ Եթե 1999-2001թթ.-ին հանրապետությունում մայրական մահացության ցուցանիշը եղել է 40 պրոմիլ, ապա 2014թ.-ին այն կրկնակի նվազել է` հասնելով 18.6-ի։ Արդեն 2015 թվականին գրանցվել է մայրական մահացության 5 դեպք։
